Maraming sinorpresa ang aktor na si Diether Ocampo nang dumalo siya sa launching ng Charles & Keith Ladies Fashion Footwear na ginanap sa Greenbelt 5 noong Biyernes ng gabi, January 9. Dumating kasi siyang may kasamang isang mestisahing babae ngunit ayaw banggitin ni Diether ang pangalan nito dahil ayaw raw niyang may makuhang anumang detalye sa kanyang ka-date noong gabing 'yon.
Umiwas sa interview si Diet dahil, ayon sa kanya, nandoon siya sa nasabing launching para sumuporta sa bagong brand na fashion footwear na pinamamahalaan dito sa Pilipinas ni Mr. Ben Chan, ang may-ari ng Bench. Kaya naman kahit anong piga sa aktor para alamin ang identity ng girl ay hindi siya napilit.
Kahit napakasimpleng tanong tulad ng pinagkakaabalahan niya ngayon ay ayaw talaga nitong sagutin. Lalo na siguro sa latest development ng kanyang nabalitang paglipat sa GMA-7.
"Please, wala munang interview. Nandito ako to support Ben Chan," pakiusap ni Diether sa gustong magtanong sa kanya.
Kesa mag-walk out itong bigla, pinabayaan na lamang namin siya. Pero nagkaroon naman kami ng pagkakataong makausap ang babaeng kasama ng aktor. Dahil mahina ang speaking voice ng babae at dahil malakas ang music sa paligid ay hindi namin nakuha ang kumpletong pangalan nito nang banggitin niya ito sa amin.
"Later po, isusulat ko ang name ko at ibibigay ko sa inyo," excuse nito pero hindi naman nangyari 'yon.
Bago magtapos ang event, nalaman din namin ang pangalan ng kasama ni Diether. Siya ay si Rima Otswani, isang commercial and print model. But for some reason, kahit ang line of work ng girl ay ayaw ipaalam ni Diet.