Paolo Contis on Lian Paz: "Mahal ko naman siya."

Kung may isang ugali man si Paolo Contis na masasabing consistent ay ang hindi niya pag-deny kung sinuman ang karelasyon niya. Kaya hindi na nagulat ang marami nang mag-guest si Paolo sa Startalk noong Sabado, Enero 10, at sabihin ang magandang pagtitinginan nila ng EB Babes member na si Lian Paz.

Kung meron naman sigurong nakakagulat sa mabilis na pag-amin ni Paolo tungkol sa kanila ni Lian, ito ay dahil kailan lang napabalita ang breakup nila ng ex-girlfriend niyang si Isabel Oli.

Ngayong mas open na si Paolo tungkol sa kanila ni Lian, sinadya siya ng PEP (Philippine Entertainment Portal) sa taping ng Bubble Gang kahapon, January 12, sa Studio 5 ng GMA Network.

"E, lumabas na, e!" natatawang sagot ni Paolo nang tanungin namin kung bakit umamin na rin siya agad.

Paliwanag niya, "Well, actually, plano talaga namin... Well, hindi naman plano, but sana, eventually na lang, kung kayang itago, itago. It's for her [Lian] own good na rin naman. Kasi nga, katulad ng mga nangyayari ngayon, may mga lumalabas na hindi kagandahan at yun ang iniiwasan namin. But then again, hindi mo naman maiiwasan yun, matagal yun."

How would he describe kung anuman ang meron sila ni Lian ngayon?

"Well, katulad nga ng sinabi ko sa Startalk, we're getting there. We don't have any dates, hindi namin minamadali or whatsoever. Technically, we're very committed. Well, I am, I don't know with this girl," sabay tingin ni Paolo sa katabing si Lian, na dumalaw sa kanya sa taping ng Bubble Gang.

"Basta sobrang happy kami. Magkasama kami palagi. We do things together. Mahal ko naman siya," tahasang pag-amin niya.

NEGATIVE REACTIONS. Ayon kay Paolo, very much aware siya sa kung anu-ano ang mga ibinabatong hindi magandang komento ng ilan kay Lian. Karamihan ay nakakarating din daw sa kanya. Pero ayon kay Paolo, in a way, isang dahilan na rin daw ang pag-amin nila para mabigyan ng tamang protection si Lian from those negative remarks.

Paano nga ba sila nag-connect ni Lian?

"Dati, magkakilala na kami," sagot ni Paolo. "Isang incident na magkakilala kami, way back, pareho kaming taken. Pero walang kuwenta, hi and hello, text... Isang beses lang yun. Kasi nga, nabangga siya. Si Gorgy Rula [Startalk reporter], tinext ako. Missent. ‘Uy, si Lian, respondehan n'yo, nabangga!' So, sabi ko kay Gorgy, ‘Pulis ako? Hindi, joke lang!' Tawa naman siya nang tawa. Tapos sabi ko, nasa gym ako. Saan siya nabangga? Sa Crame raw. Sabi ko, ‘May kaibigan ako diyan, bigay mo number ko sa kanya.' So, that's it, period. Nag-thank you, tapos wala nang textan.

"Then, nag-break, nagkita kami sa isang taping, nagkausap. So, yun na. Siguro noong una, naggagamitan tayo para sumaya ng konti. Pero yung gamitan, naging seryoso. Naging bawal na hindi magkita sa isang araw. Naging araw-araw na. Naging parang tanga lang, kasi the good thing about it, we never expected. Hindi yung thinking namin, ma-in love, wala, e, dumating! Siguro kasi, nag-e-enjoy kami. Single kami and then, eventually nga, it got serious."

BREAKUP WITH ISABEL. Paano naman niya idedepensa ang sarili niya o si Lian sa perception ng iba na sila pa ni Isabel nang maging sila ni Lian?

"Not true at all," diin ni Paolo. "Malinaw na nga na hindi ganoon. Sinabi kong hindi, so hindi. Hindi totoo yun. Yun ang reason kung bakit ayaw naming lumabas agad. Kasi nga, feeling namin, ganoon ang mangyayari. Hindi, e. Actually, alam din namin na mabilis ang pangyayari sa amin. So, bakit mo pipigilan?

"After the breakup [with Isabel]... Actually, nauna yata silang [Lian and Mark Herras] mag-break, and then kami. It's a blessing, why would you ignore it?"

Parang hindi niya masyadong ininda ang breakup niya with Isabel?

"Before I break up with someone, I think about it, a lot of times. When I decided, that's it," sabi ng aktor.

Napagod o nagsawa ba siya sa naging relasyon nila ni Isabel?

"Well, napagod siguro...we both got tired," pag-amin niya. "It's a very, very long process. We had to make a decision. It's a long process, contrary dun sa mga naiisip ng ibang tao na in a snap, wala na. Matagal na proseso yun. Kaya nga sinabi ko, noong magdesisyon ako, sure na ako run."

MEETING THE FAMILY. May mga nagsasabi naman na kung siya raw ay very much okay at pabor ang pamilya ni Lian sa kanya, hindi raw ganoon on his family's part. Naipakilala na ba niya si Lian sa pamilya niya?

"Wala pa, wala pang chance na magkita sila. Hindi pa sila nagkikita. Wala pang time na magkita-kita sila. Siyempre, umaano pa ako, ako ang pume-placing. Sa pamilya ko, wala namang problema ‘yan. Hindi naman siya yung nanliligaw sa akin. Ako ang nanliligaw sa kanya, e," saad ni Paolo.

Totoo ba na ang loyalty ng family niya ay na kay Isabel pa rin na naging close na sa mga ito?

"Wala naman. I didn't talk to her about it. Nangyari rin sa kanila ni Nancy [Castiglione, Paolo's ex-girlfriend] noon, so naka-move on naman sila. E, kung ang anak nga nila naka-move on, bakit hindi na lang kaya sila, di ba?" natatawang biro ni Paolo.

"I AM MYSELF." Sinabi namin kay Paolo na kahit paano, nasubaybayan rin namin ang lovelife niya. This time, paano niya masasabing iba ang nararamdaman niya ngayon, lalo pa nga't he's had different serious relationships in the past?

"Sabihin na lang natin na, finally, I am myself," sagot niya. "Siguro, napatunayan ko rin na hindi sa tao ‘yan, nandoon sa tao at nandoon sa dadalhin sa ‘yo ng Diyos. Kahit sampung taon na kayo, pero kung darating na yung tamang tao para sa ‘yo, yun na yun."

Sa palagay kaya niya ay puwede siyang gawing example ng ibang mga artista na takot umamin kapag may karelasyon sila?

"Ako kasi, never akong nag-deny. Sa akin lang, sa mga hindi umaamin, sino ba ang pinahihirapan n'yo? Actually, hindi kayo kundi yung partner n'yo. Why would you, especially showbiz or non-showbiz ang partner mo? Hindi naman tanga ang Filipino. Kapag alam nilang may girlfriend ka, tatanggapin pa rin nila yun basta maganda ang ginagawa mo.

"Sa side ko lang, ayokong pahirapan sana... Dine-deny ko siya nang dine-deny, tapos sinisiraan siya nang sinisiraan, tapos walang nagpoprotekta sa kanya. So, ngayon, alam na nilang meron kaming something, kahit paano, tatahimik ka na ngayon. Kahit paano, respeto na lang nila sa akin, di ba? Yun na lang sa akin. Sabi ko rin sa kanila, let's prove to them na mali sila," pahayag ni Paolo.