Mocha promises to be "more daring and delicious" this year

May bagong pasabog na naman ang singer na si Mocha ngayong 2009. All- out at talagang palaban na sa hubaran ang lead singer ng all-female group na Mocha Girls. Sa mga seksing larawan niya na unang ipinakita ni Mocha sa PEP (Philippine Entertainment Portal), patunay lamang na handa na siyang makipagsagupaan sa mga sexy actress sa ngayon.

"Yes, I will be more daring and more delicious this 2009!" pabirong bungad ni Mocha sa interview ng PEP. "Handang-handa na akong makipagsabayan sa paseksihan. Sinimulan ko na ito kaya mas matitindi pang kaseksihan ang aabangan n'yo sa akin."

Kahit na nga may ilang mga intriga at kontrobersiyang kinasangkutan ang Mocha Girls last year, masayang-masaya pa rin si Mocha dahil overall ay naging maganda ang taong 2008 para sa kanilang grupo.

Sunud-sunod na mga proyekto at magagandang opportunities ang dumating sa Mocha Girls noong isang taon, kabilang na ang launching ng kanilang second album Mocha Girls Delisciosa under Viva Records, at ang matagumpay nilang U.S. tour na nag-kick off sa Guam. Proud din si Mocha sa kanyang pagiging celebrity endorsers ng ilang produkto.

"Maraming blessings ang dumating sa amin last year kaya naman wish ko na sana ay mas maraming pang projects para sa group namin. More success para sa group namin this 2009," hangad ni Mocha.

FIRST ACTING JOB. Isa pang ipinagmamalaki ni Mocha na nangyari rin noong 2008 ay ang pagsabak ng grupo nila sa pag-arte para sa kanilang first movie, Sumpa, under Yellow Media mula sa direksiyon nina Carlos Agustin at Melvin Brito.

Ngayong malapit na itong ipalabas sa first quarter ng 2009, abala ang Mocha Girls sa pag-promote ng Sumpa. Isa itong sexy-horror movie na pinagbibidahan ng respetadong aktor na si Mark Gil at ng young actor na si Joross Gamboa. Si Mocha ang tumatayong lead actress sa pelikula. Kasama rin sa Sumpa ang iba pang miyembro ng Mocha Girls na sina Hershey, Grace, at Bez. Full support naman ang tatlo kay Mocha sa kanyang pagpapa-sexy sa pelikula.

Aminado si Mocha na magkahalong kaba at excitement ang kanyang naramdaman sa paggawa ng first movie niya.

"Pinag-isipan ko talagang mabuti ito. First movie ko ito tapos sumabak kaagad ako sa matitinding kissing scenes at bed scene kasama si Joross Gamboa," saad ni Mocha.

Palaban nga sa hubaran si Mocha. Matapang nga rin niyang ipinakita ang ilang maseselang parte ng kanyang katawan sa pelikula. Hindi ba siya nagdalawang-isip na gawin ito?

"Napakaganda kasi ng istorya ng pelikula kaya napapayag na rin akong gawin ang ilang eksenang alam kong pananabikan ng lahat. At saka maganda naman po ang pagkakakuha ng mga direktor namin sa mga sexy shots ko. Joross is also very professional and a real gentleman. Hindi niya sinamantala yung moment na yun. Hindi po ako nababoy o na-exploit sa movie," paliwanag ni Mocha.

Hindi ba siya natatakot na baka sa kanyang pagsabak sa matitinding hubaran ay mabastos siya?

"Hindi naman po ako nagwo-worry or natatakot. Role lang naman po ang ginagampanan ko at hindi ibig sabihin noon ay ganun na ako sa totoong buhay. Hindi naman po ako easy girl. Hindi naman ibig sabihin na nagpapaseksi na ako ay masamang babae na ako. Nasa pagdadala rin po 'yan at kung paano mo ipakita ang sarili mo sa mga tao off cam."

Ano ang feeling na makatrabaho ang dalawang magagaling na aktor na sina Mark at Joross?

"I feel very blessed and honored na makatrabaho sila. Actually, at first parang nahihiya ako and medyo intimidated, kasi mga kilalang artista na sila, e. Pero I began to feel more comfortable nang makausap ko na sila at makilalala pa nang husto. Very supportive sila sa akin kahit na baguhan pa lang ako and the rest of the girls. They motivate me to do well sa mga eksena namin. All I have are good words for Mark and Joross," papuri ni Mocha sa dalawang aktor.

MOCHA-JOROSS ROMANCE? Nilinaw rin ni Mocha ang lumabas na isyu noon tungkol sa diumano'y panliligaw ni Joross sa kanya, pagkatapos ay nakitang may kasamang ibang babae ang aktor noong birthday niya last year.

"Never naman po naming sinabi ni Joross na may special something between us. Kaibigan ko po si Joross. We are really good friends. Actually, in-invite niya ako with the rest of Mocha Girls sa kanyang birthday, kaya lang meron kaming commitment that day kaya hindi kami nakadalo," paglilinaw ni Mocha.

So, hindi ba siya nasaktan nang malamang may special girl na si Joross?

"Wala naman pong reason para masaktan. Sabi ko nga, wala naman po kami. Kung totoo ngang meron na siyang girlfriend o special girl ngayon, I'm happy for Joross at masaya ang puso niya."

Siya kaya, masaya ba ang puso niya ngayon?

"Masaya naman po, kahit wala akong boyfriend right now. Marami naman pong mga taong nagmamahal sa akin, ang family ko, pati ang supporters ng Mocha Girls. Yun pa lang enough reason na para sumaya ang puso ko. Tapos bonus pa na maraming projects na dumadating sa akin at sa group namin."

Bukod sa sexy-horror movie ni Mocha na malapit nang mapanood, pinu-promote din ng morenang singer-actress ang kanyang 2009 poster calendar na naglalaman ng mga kaakit-akit at sexy niyang mga larawan. Siya kasi ang napiling 2009 Calendar Girl ng Jancen Cosmetic Surgery.

Magkakaroon din ng sarili niyang page si Mocha sa isang sexy men's magazine simula nitong February. Ilalathala rito ang ilan sa kanyang mapupusok na mga larawan na kuha mula sa kanyang sexy at kontrobersiyal na buhay.