Kasamang dumating ni Marian Rivera sa isang afternoon of chikahan with select entertainment press, kabilang na ang PEP (Philippine Entertainment Portal), sa executive lounge ng GMA Network Center kahapon, January 26, ang program manager ng Ang Babaeng Hinugot Sa Aking Tadyang na si Ms. Redgynn Alba.

Si Redgynn na rin ang nag-confirm na sa February 2 na ang pilot telecast ng ikatlong primetime series nina Marian at Dingdong Dantes. Kaya medyo stressed daw sila dahil biglaan ang schedule na dapat ay sa February 9 pa. Magsisimula pa lang daw kasi silang mag-taping ng week three ng Ang Babaeng Hinugot Sa Aking Tadyang. 

Bakit bigla ang desisyon na mapaaga ang pilot telecast nila?

"Ang dami na po kasing request na gusto na nilang mapanood sina Dingdong at Marian," paliwanag ni Redgynn. "Naiinip na raw sila dahil October 2008 pa nila huling napanood sa Dyesebel ang dalawa."

Kaya raw sa final week ng Lalola starting February 2, magiging apat na soaps na ang mapapanood sa Kapuso network pagkatapos ng 24 Oras. Bukod pa rito ang Koreanovela na Money War.

On February 9, balik na sa regular tatlong local soaps at isang Koreanovela—Luna Mystika, Gagambino, Ang Babaeng Hinugot Sa Aking Tadyang, at Money War.

Tinanong ng PEP si Marian kung hindi ba siya natatakot dahil iba ang role na ginagampanan niya sa bagong soap nila ni Dingdong.

"Medyo nag-aalala nga po ako, kasi nasanay na ang televiewers sa akin na ako ang inaapi," sabi ni Marian. "Dito, matapang ako, misteryosa, street-smart, naughty at ibang-iba ang ayos ko. Kahit ang makeup ko, iniba rin nila. Pero ipinagdarasal ko po na magustuhan nila ito dahil talagang pinaghandaan ko, namin ni Dingdong, ang mga characters namin dito."

WHAT'S THE REAL SCORE? Speaking of Dingdong, since pareho na silang libre ng kanyang leading man, ano na talaga ang real status nilang dalawa ngayon?

"Lumalabas po kami, pero hindi naman po talagang date," sabi ni Marian. "Minsan, tatawag siya sa akin, kung wala raw akong appointment, puwede ba kaming mag-lunch o mag-dinner. Like kaninang umaga, tumawag siya kung gusto ko raw mag-lunch kami. Sabi ko, okey. Ayun, nag-lunch kaming dalawa sa Serendra, hindi ko lang po napansin kung ano ‘yong restaurant. 

"Last Friday [January 23], wala po kaming taping dahil Tuesday, Thursday, and Saturday ang taping namin, tumawag siya kung nasaan daw ako. Sabi ko nasa Rockwell ako, pupunta raw siya. Kumain lang po kami sa Oliver's Sandwich."

May nakakita raw sa kanila, sweet na sweet daw sila sa isa't isa.

"Hindi naman po," tanggi ni Marian. "Ganoon na kasi kami noon pa ni Dong. Siguro dahil talagang naging close na kami simula pa ng Marimar at wala pong nababago sa samahin namin. Wala po kaming ginagawang masama kaya hindi namin itinatago kung lumalabas man kami."

Wala pa ba siyang ibang feelings para kay Dingdong?

"Hindi ko naman po isinasara ang pinto ko kay Dong. Dahil lagi nga kaming magkasama, hindi po malabong magkagusto ako sa kanya," diretsong sagot ng dalaga.