Sa ikalawang Linggo ng Marso magtatapos ang una't huling eight-part episode ng GMA-7 drama anthology na Dear Friend nina Jolina Magdangal at Marvin Agustin, ang "Bulong ng Puso" na pinagbibidahan nina Jennica Garcia at Mart Escudero.

Itong Linggo, Marso 1, hanggang Huwebes, Marso 5, nakatakdang lumipad patungong Dapitan City, Zamboanga del Norte, sa Dakak Park and Beach Resort ang cast and crew ng Dear Friend para kunan ang four-part summer episode na pinamagatang "Karibal."

Directed by Jun Lana, naibalita na ang original cast ng "Karibal" ay sina Katrina Halili, Yasmien, Alfred Vargas, at introducing si JC Tiuseco.

Hindi pumuwede ang schedule ni Yasmien dahil nag-aaral ang StarStruck 1 First Princess, kung kaya't pinalitan siya ng StarStruck 4 Ultimate Sweetheart na si Jewel. Si Jewel ang magiging partner ni JC, ang kauna-unahang Pinoy Sole Survivor.

Ang "Karibal" ay magsisilbing reunion naman ng love team nina Alfred at Katrina pagkatapos ng pelikula nilang Gigil noon sa Regal Entertainment, na si Jun Lana din ang nagdirek at sa Boracay naman ito kinunan noon. Ang Boracay rin ang isa sa dalawang pinagpiliang location ng "Karibal" pero mas napaboran nga ang Dakak.

Makakasama rin sa cast ang isa pang StarStruck avenger na si Kevin Santos.

Sa Marso 15 ang unang telecast ng "Karibal."