Totoo bang minura niya si Ms. Wilma sa text?

"Sinasabi niya sa lahat ng diyaryo, na yung text ko raw sa kanya, minumura ko raw siya. Na ano raw... Hindi ako nagmura sa text kasi ano yun, libelous yun, di ba? Tanga ba naman ako na mumurahin ko siya sa text, e, di meron na agad siyang proof, di ba? Hindi ko siya minura sa text.

"Tine-text ko lang siya ng masama na alam ko. Ang kapal naman ng mukha ng isang tao kung hindi pa masasaktan sa mga texts ko! Pero walang kasamang mura. Uulitin ko ang text ko, habang nasa loob ng kuwarto ni Wilma si JC dahil sabi nga ng alalay, nandoon pa sa loob. So, sabi ko sa kanya, 'Hayop ka, traydor ka! Nanunulot ka na naman ng talent! Palagi mo na lang ginagawa sa akin 'yan!' Sabi ko sa kanya, 'Makakarma ka at gagantihan kita.' So, walang mura run."

SETTLEMENT. Pero aminado si Annabelle na kung si JC ang tatanungin, mas gusto nitong magkaayos na lang sa GMA-7.

"Totooo yun. Si JC kasi, sinabi niya na, 'Tita, kung magkakaayos, mas okey sa akin. Kasi, marami na akong kaibigan sa GMA. Dito na ako lumaki. Dito ako nag-umpisa. Ngayon, kung ikaw ang manager ko at kung ano ang makabuti sa akin, bahala ka na. Pero kung magkakasundo-sundo, mas gusto ko sa GMA.' Totoo yun, totoo yung sabi niya. Kasi nga, marami na siyang kaibigan. Naging close na siya sa mga staff, sa mga director. Pero sinabi rin niyang, 'Tita, ikaw ang manager ko, ikaw ang masusunod.' Mabait na bata 'yang si JC."

Ayaw na raw sabihin sa kanya ni JC ang eksaktong napag-usapan nila ni Ms. Wilma. Sinasabi lang daw ng young actor na natakot siya sa mga legalities.

"Kaya nag-sorry rin naman ako kay JC. Sinabi ko na next time, sasama na ako. Kasi, kung wala si Jun Lalin [her publicist], dapat ako talaga ang sumama. So, sabi ko, next time, hindi na mauulit yun. Hindi na siya magso-solo na."

THE MEETING. Sinagot din ni Annabelle ang mga naglalabasan na tila na-bypass siya ng parents ni Heart nang makipag-usap ang mga ito kay Atty. Felipe Gozon, ang President, Chairman, at CEO ng GMA-7, at iba pang executives ng GMA-7. Ayon kay Annabelle, siya pa raw mismo ang nagsabi kay Ms. Annette Gozon-Abrogar ng GMA Films na makikipag-meeting ang parents ni Heart.

"Nag-meeting sila hindi ako sumama dahil alam ko na nandoon si Wilma," sabi ni Annabelle.

Tinanggap na ba niya ang Ngayon at Kailanman para kay Heart?

"Wala pang offer," sagot niya. "Noong nagkagulo na kami, yun na ang offer. Pero hindi pa ako makasagot. Kasi, ganito ang nangyari diyan, noong in-offer nila ang panghapon, sinabi ko na ayoko ng panghapon dahil galing si Heart sa primetime. Sabi ko, 'Ano ang gagawin ni Heart sa hapon?' Sabi nila, Sine Novela. Sabi ko, 'Di ba, Sine Novela, sine yun?' Sabi nila, 'Hindi, pang-hapon yun!' Ang alam ko talaga, ang Sine Novela, sine yun! Noong pumirma, akala ko sine yun, yun pala panghapon! Wala namang ini-explain si Wilma na panghapon, akala ko talaga, Sine Novela, sine! Hindi naman sinabing afternoon soap! So, wala kaming magagawa, talagang gagawin ni Heart ang isang afternoon soap dahil nasa kontrata talaga yun.

"Pero yung in-offer nilang Muling Buksan ang Puso, yun ang tinanggihan namin, baka bibigyan siya ng bagong soap. Yung sa kontrata rin ni Heart, Koreanovela, kaso hindi pa ayos kaya bibigyan muna siya ng iba. Pero ayos na sila. Naayos na ang problema nila. Si JC na lang ang natira."

MARVIN AGUSTIN. Nilinaw rin ni Annabelle na hindi si Marvin Agustin ang inaayawan niya sa Obra kundi yung role na hindi babagay rito.

"Eh, katulad nga noong movie nina Richard at KC, ipinapasok niya [Wilma] si Marvin Agustin!  Hindi bagay! Paano naman magiging kapani-paniwala na magugustuhan ni KC si Marvin at pagseselosan ni Richard? Kaya sabi ko, hindi bagay. Noong si Alfred Vargas yung inilagay, umangal ba ko? Hindi! Bagay sa kanya, wala naman akong kinikita kay Alfred, hindi ko naman alaga yun.     

"Yung sa Obra, yung sa role kay JC ang inayawan ko. E, mabuti pa ang iba diyan binibigyan ng lead roles, kahit wala pa naman. E, si JC, six years na diyan. Yung iba, binibigyan ng lead role kahit wala namang ratings," saad ni Annabelle.