Sa elevator pa lang on his way to the 17th floor of GMA Network, kung saan ginanap ang presscon ng pelikulang Sundo kahapon, March 3,ay tinanongna ng PEP (Philippine Entertainment Portal) si Mark Bautista tungkol sa naglabasang blind items tungkol sa kanila ng isang actor-singer.
"Hindi ko alam," ang sagot ni Mark hanggang sa ma-interview na namin siya sa presscon proper.
Ang unang blind item ay tungkol diumano sa pagkakabangga ng isang kotse sa isang tricycle. Nakita raw ng ilang saksi na ang nagmamaneho ay ang singer habang kasama niya sa kotse ang actor-singer.
Ang pangalawang blind item ay tungkol naman sa pagkakakita sa singer at sa actor-singer na nagpapaalaman sa elevator ng isang condo building. Narinig din daw ng isang witness na "Mac" ang tawag ng actor-singer sa singer.
"Nakakatawa lang dahil sunud-sunod ang labas ng blind items at hindi ko alam kung saan nanggagaling," sabi ni Mark. "Ang iba, 50 percent lang ang totoo. Gaya noong nakabangga ako ng tricycle, totoo yun, pero lolo ko ang kasama ko. In fact, tinawagan ko pa ang lolo ko na tulungan ako dahil ayaw kong bumaba at humarap. Tapos nagulat na lang ako sa nakasulat kung sino ang kasama ko.
"Yung issue sa elevator, ngayon ko lang narinig 'yan at hindi rin totoo. Hindi ko rin alam kung saang elevator ang sinasabi sa write-up. May video raw... Ilabas nila ang video.
"Nakakatawa at naaawa ako sa tao at hindi talaga siya titigilan. Bothered ako dahil may nadadamay sa mga isyu sa akin at hindi ko alam kung saan nanggaling. Bilang kaibigan nung tao, naaawa ako dahil grabe ang mga nasusulat," sabi ni Mark, na hindi binanggit ang pangalan ng kanyang tinutukoy.
Dagdag niya, "Manhid na yata siya, pero alam kong nasasaktan din kahit papaano. Hindi lang siya ang tumatawag ng 'Mac' sa akin at may nasulat pang dinadalhan ako ng pagkain. Hindi lang siya ang nagdadala ng food. Pag may Sunday gathering kami, potluck kami, kanya-kanya kaming dala ng pagkain."
Hindi raw nila napag-uusapan ng singer-actor ang lumalabas na blind item. Pero alam ni Mark na alam nito at nasasaktan, at ayaw na lang mag-elaborate. Kapag magkakasama raw silang magkakaibigan, hindi nila ito kinakikitaan na namumuroblema sa tsismis.
"Kaya nga kung puwede, huwag na lang i-mention ang name niya sa PEP dahil hindi rin naman binabanggit ang name niya sa mga nasusulat. Naawa ako sa kanya na sobrang manhid na yata sa mga naglabasan," pakiusap ni Mark.
MARK ON GMA-7. First time naman ni Mark na makapunta sa 17th floor ng GMA Network, kung saan ginawa ang presscon ng Sundo. Hindi siya mapakali at ayaw raw niyang gumalaw dahil naninibago ang ABS-CBN talent. Sa Q&A portion na siya na-relax, sa tabi ng cast na puro talents ng GMA-7 at naging kaibigan niya sa shooting.
First time din niyang makatrabaho si Robin Padilla. Karamihan pa ng eksena niya ay kasama ang action superstar dahil driver nito ang role ni Mark.
Kumusta ang pakikipagtrabaho kay Robin?
"Nakaka-starstruck, sobrang starstruck ako!" sambit ni Mark. "First scene namin, magkatabi kami at parang nabubulol ako. Sinabi ko sa sarili ko na, 'You have to do your work at i-set aside ang pagiging fan.'
"May pressure ang makasama siya, action star siya at sikat pa. Balak kong magpa-picture sa kanya na hindi ko nagawa hanggang natapos ang shooting. Bilib ako sa kanya. Nakaka-inspire ang sobrang dedication sa work at nagsa-suggest kay Direk Topel [Lee] kung ano ang dapat gawin at mas makakaganda sa pelikula," kuwento ni Mark.
Magpo-promote din si Mark ng Sundo sa SiS bukas (March 5), sa Eat Bulaga! (March 7)sa Saturday, sa Showbiz Central sa Sunday (March 8), at sa Walang Tulugan ni German Moreno.
Hindi lang siya puwedeng mag-guest sa SOP dahil katapat nito ang ASAP '09 ng ABS-CBN, kung saan mainstay si Mark.
Hindi rin makakadalo si Mark sa premiere night ng Sundo sa March 17 dahil aalis sila ni Sarah Geronimo sa March 11 para sa kanilang U.S. tour, na magtatagal ng ilang linggo. Sa March 18 naman ang showing ng pelikula.
ON SARAH GERONIMO. Speaking of Sarah, inusisa ng PEP si Mark kung wala siyang balak ituloy ang panliligaw ngayong nasa edad nang magka-boyfriend ang singer-actress.
"Pinahinto niya ako manligaw noong una dahil hindi pa siya ready," sabi ni Mark. "At sa nakikita ko, hindi pa rin siya ready ngayon. Sa career pa rin ang focus niya at ayokong makigulo.
"Sobrang happy ako sa success niya at sa success ng You Changed My Life [Sarah's movie with John Lloyd Cruz].Pinanood ko ang movie sa premiere night at tinext ko siya after, at sinabi kong maganda at nakakatuwa ang movie. Friends pa rin naman kami at makakasama ko nga siya nang matagal. Tama na yung magkaibigan kami."