Natiyempuhan ng PEP (Philippine Entertainment Portal) si Aubrey Miles sa taping ng Juicy ng TV5 last Monday night, March 9, kaya inusisa na namin siya sa sinasabing pagbabalik-showbiz niya.

"It's true," pagkumpirma niya. "Nagpapa-release na ako kay Kuya Dondon [Monteverde, her manager], pero hindi ko maintindihan kung bakit ayaw pa niya akong i-release.

"Hindi ko nga maintindihan, kasi wala na rin naman siyang naibibigay na work. And besides, wala na rin naman siyang makukuha, kaya wala ring problema sa akin kung bitawan na niya ako. Pero ayaw pa rin nga niya. Pinag-uusapan pa rin namin ang tungkol diyan."

Sa ngayon, nanay na muna ang drama ni Aubrey para sa five-month-old baby nila ni Troy Montero na si Hunter. Ibang-iba na nga kung mag-isip si Aubrey.

"Dati, reckless pa akong mag-decide sa kung anu-anong bagay," sabi niya. "Ngayon, lagi akong nagdadalawang-isip. Baka makaapekto sa anak ko, kay Troy. Lagi ko munang iniisip ang kapakanan ni Troy at ng baby namin.

"Pati nga pagbubuhat na lang sa baby, yung paglilinis sa bata kapag madumi, nagbabago ang perception ng isang parent. Nararanasan ko yun. Mas nagiging mapagpasensya ako."

CONTINUE THE FIGHT. Napag-alaman ng PEP kay Aubrey na nagtangka palang makipag-ayos si Mrs. Rose Flaminiano sa grupo nila nina Ara Mina, Maui Taylor, Aster Amoyo, at iba pa, tungkol sa kasong may kinalaman sa real-estate properties na ang deal ay hindi nasunod, at lumalabas na niloko sila diumano ng nabanggit na producer at talent manager.

"Nakiharap naman kami sa kanya, kaya lang, nakakatawang nakakahiya ang nangyari. Gusto niyang bayaran na lang niya kami ng tigwa-P100,000, e, kung tutuusin, mahigit one million pesos sa bawat isa sa amin ang damage. At yun lang ang ipinaglalaban namin, kaya nga nagkaroon ng kaso.

"Pilit naming iniintindi ang financial situation niya. Pero para namang nagmumukha kaming kawawa, lalo na kung pumayag kami sa halagang ganoon lang, para makipag-ayos, samantalang kami rin naman ang nasira sa kagagawan niya.

"Natatawa nga kami dahil si Ara, pinapapayag sa P200,000, e, sabi nga namin, halaga lang yun ng isang bag na karaniwang nabibili namin. Not for anything else, hindi na ito pera-pera lang. Kung hindi yung gusto rin namin siyang maturuan ng leksyon sa abalang nagawa niya sa amin," lahad ni Aubrey.

Nasabi ni Aubrey na kapalit ng pag-e-endorse nila sa nabanggit na proyektong yun ni Mommy Rose, marapat lang na kung ano ang napagkasunduan, yun ang mapunta sa kanila.

"Walang nangyari sa usapang yun. Ang resulta, nagkaisa kaming lahat doon against Mommy Rose, at pinalakas namin ang aming puwersa laban sa kanya. Hindi namin siya uurungan," pagwawakas ni Aubrey.