Kung may mapapansin man kay Mike Tan ngayon, ito ay ang mas magandang pangangatawan na niya. Ayon kay Mike, naging gym addict na raw siya dahil simula nang hindi siya nagkakaroon ng regular show, naging busy raw siya sa pagdyi-gym.
Nagsimula ang addiction niya sa gym matapos masabihan ng isang kasamahan sa teatro na pinagkaabalahan niya nung nababakasyon siya from TV, na ibalik ang dating ganda ng katawan.
"Although noon, mas lean ako. Ngayon, mas malaki na yung katawan ko. Sabi niya, ibalik ko raw yung dati kong katawan. So, after ng theater, itinuluy-tuloy ko na siya and after that nga, nagkaroon na ako ng Dapat Ka Bang Mahalin?. Doon na rin po ako naging busy at pagdyi-gym."
ENJOYING THEATER. Sa pakikipag-usap ng PEP (Philippine Entertainment Portal) kay Mike nung Wednesday, March 25, sa UCC Morato, sinabi rin nitong wala pa raw siyang gagawin matapos ang Dapat Ka Bang Mahalin?, so malamang daw na maging abala muli siya sa teatro.
"Sabi sa akin ng CCP [Cultural Center of Philippines], gusto nila kong pag-audition-in, so, mag-a-audition ako ulit. Nag-enjoy ako ng sobra sa theater at saka, malaki rin ang naitulong sa akin. Sa showbiz naman, so far, wala namang sinasabi sa akin ang Artist Center, hindi naman sila nakikipag-meeting or what. Parang ako, come what may...kung may maibibigay, sige lang. Sanay na rin naman ako. Dati na naman akong ganoon. Hindi naman ako nagmamadali. Kung wala, e, di balik ako ng teatro. At least, pagbalik ko sa TV, may naipapakita akong bago."
Diretso na naming tinanong si Mike kung sa palagay niya ba, may pagkukulang sa part niya or may nagawa siya kung bakit kumpara sa ibang produkto at masasabing winners sa StarStruck ay tila mas mabagal ang pag-usad ng career niya?
"Ako...sa totoo lang, hindi ko alam kung ano.... Hindi ko alam. Siguro meron sila na wala ako. Meron sila na nakikita ang mga producers or GMA, so, ako, kailangan ko na lang patunayan ang sarili ko ngayon. Kahit mahirap, sana maiangat ko yung sarili ko."
WAS THERE A PROBLEM? Was there a time that he asked himself, ano nga ba ang nagiging problema or kulang?
"Tinatanong ko yun sa sarili ko. Pero hindi ko rin alam, e. Kaya ang ginagawa ko, kung kaya kong mapabuti ang craft ko, yun ang ginagawa ko. Nagwo-workshop ako ng nagwo-workshop para kung makita nila 'ko, 'Wow, eto pala si Mike Tan, may kaya pala siya.'"
Dating ginagawang issue sa kanya ay yung attitude niya raw sa pakikisama, yun pa rin ba ang isyu sa kanya hanggang ngayon?
"Ewan ko sa pakikisama..? Wala na nga akong isyung ganun. Mukhang mabait na yata ako," natatawa niyang sabi. "Dati pa naman akong mabait, kaya lang, hindi ko pa alam sa showbiz world noon. Hindi ko pa alam na kailangan pala, ganito, ganyan..."
Balik sa pagpapaganda ng katawan niya, ano ba talaga ang plano niya?
"Wala lang, ano lang, reward sa sarili ko," natawa niyang sabi. "At saka, sana lang, maging flexible sa mga roles. At saka gusto ko na rin, para at least, may exercise ako. Kasi, yung dati kong exercise, wala lang. E, ang lakas kong kumain. So, kapag wala akong exercise, lumolobo talaga ko."
So itutuloy niya ba yung nasimulan niya noon sa grupong Studs na magpapaseksi na siya nang tuluyan?
"Hindi ko alam, e, paano ko ba sasagutin yun? Parang ako, kapag ginawa ko yun, parang do or die na lang. Ha-ha-ha! Actually, hesitant naman talaga 'ko. Hindi ako prepared to do that, until now. Siguro, kaya ko mga pictorial."
Ano ang hindi niya kaya?
"Ako kasi, depende sa hinihingi, depende sa script. Yung frontal, hindi ko talaga kaya yun. Kaya ko lang siguro yung medyo sexy, pero hindi ko rin alam."
Dugtong pa niya, "Kung siguro nakikita sa akin yung pagpapa-sexy, thank you. Pero sa character ko, parang hindi ko pa kaya. Isang factor na rin siguro yung galing din ako sa conservative na pamilya at sa sarili ko mismo. Siguro, sexy lang pero wala yung may ipapakita talaga."
WITH MARKY GONE. Tinanong din namin si Mike kung masasabi nga ba niyang nabalik ang closeness or friendship sa pagitan nila ni LJ Reyes sa maagang pagpanaw ng kaibigan nilang si Marky Cielo?
"Actually, okey na kami ni LJ bago pa man mawala si Marky. Okey na kami. Siyempre, gawa pa rin ni Tatay Rommel [Gacho, GMA Creative Consultant]. Parang bigla kaming sine-set-up na, 'O, pumunta ka rito, nagbi-videoke kami.' Pagdating ko, nandun. 'Tapos, nakakapag-usap na kami. Hanggang sa maging okey kami.
"Pero, mas naging okey kami noong nawala nga si Marky. Kasi, mas nakakapag-usap na kami. Mas nakakapag-share kami...kasi, kaibigan naming parehas. Hindi ko naman sinasabing mas nakabuti yung pagkawala ni Marky, kumbaga, mas naging okey lang kami."
Kapag nakikita niya ngayon si LJ, wala bang panghihinayang sa kinahinatnan ng relasyon nila noon?
"Hindi...ano ko yun, e. Kumbaga, isa yun sa mga bagay na maite-treasure ko. Marami siyang mga bagay na naituro sa akin. Sana , marami rin akong nai-contribute sa kanya."
MIKE'S LOVELIFE. This time, mas open na rin si Mike sa lovelife niya. Aniya, meron naman daw siyang non-showbiz girlfriend na tumatagal na rin ng three years and two months. Childhood friend niya raw ito from Mandaluyong pero hindi raw niya naging kaklase dahil sa private school daw nag-aral ang girl while siya naman ay sa public school.
"Nag-aaral pa siya, she's a working student at U.P., taking up European Languages. Marami pa kaming pangarap kaya hindi pa naming napag-uusapan ang kasal."
Hindi ba nahihirapan ang girl na artista siya?
"Very understanding siya. 'Tapos, siyempre minsan, nagkakaroon ng argument, pero lahat naman, nakukuha namin sa maayos na usapan."