Wala raw sinasabi ang Star Cinema na may special appearance si Gabby Concepcion sa Mother's Day movie nitong BFF (Best Friends Forever), na pinagbibidahan nina Sharon Cuneta at Ai-Ai delas Alas. Showing na ang BFF sa May 13.
Ito ang nilinaw sa PEP (Philippine Entertainment Portal) ng director ng BFF na si Direk Wenn Deramas sa presscon na ginanap sa Dolphy Theater ng ABS-CBN kahapon, April 27.
"Hindi ko nga alam kung saan galing 'yan e. Hindi ko talaga alam 'yan. Ang tanong ko lang, saan ko siya ilalagay sa pelikula?" pahayag ni Direk Wenn.
Pero kung bigla ngang sabihin ng Star Cinema na may special appearance si Gabby, okay lang ba sa kanya?
"Of course," sagot ng direktor. "Sino ba naman ang tatanggi sa Gabby Concepcion? Iisipin ko lang kung saan ko siya ilalagay. Kasi natapos ko na yung ending. Ang hindi ko na lang nakukunan ngayon yung mga sundot-sundot na mga eksena."
So, imposible na bang pumasok pa sa pelikula si Gabby?
"Hindi naman siyempre imposible kung appearance lang naman. Aaralin ko lang kung saan siya puwede."
BFF, THE MOVIE. Samantala, very excited naman si Direk Wenn sa BFF dahil bukod nga sa dalawang bigating bida na sina Sharon at Ai-Ai, bagong elemento raw ng comedy ang ipakikita nila sa movie na ito.
"Nung kinonceptualize kasi ito, sabi ko, 'Anong klaseng comedy ang gusto n'yo?' Sabi, realistic daw dahil si Sharon ito. Tapos sumunod, sabing ganyan dapat si Ai-Ai, Tanging Ina, comedy pa rin. 'Okay, Tanging Ina is cartoons, anong klaseng cartoons level tayo ngayon?' So, hinihimay namin. 'O, ngayon, walang bawian ha,' sabi ko.
"Ngayon nung habang nagsu-shoot na, sabi nila, 'Wenn kailangan pa rin namin ng cartoon-kartunan na ano mo.' So, nag-i-inject ako. Pero hindi naman siya isang buong pelikulang ganun. Seryoso ito, e. Kung titingnan mo yung istorya nito, seryoso ito. Tungkol ito sa isang babae na malaki, na napapabayaan ng asawa na may kabit. Ang kabit, si Ai-Ai. Si Ai-Ai kasi yung the funny, the sexy, magaling sa sex. So, nagsimula si Mega na mag-workout. Yung kanyang instructor is si Ai-Ai, not knowing na yun ang kabit ng asawa niya. Naging mag-best friend na sila nung malaman ni Sharon yun.
"Grabe yung laitan nilang dalawa rito. Yung ipinapakita sa trailer, wala pa yun, grabe talaga, pero matutuwa kayo. Kaya nga nung ibinigay sa kanilang dalawa yung script, ayaw ni Ai-Ai. Sabi ni Ai-Ai, 'Direk OA (overacting) na ito.' Sabi ko, alam ni Mega 'yan. Tapos sabi ko, sige harapan tayo, parang ayaw niyang maniwala na okay kay Mega, e. Sabi ni Mega, 'Mas maiinsulto naman ako pag tinawag mo akong payat.' Basta yun ang maganda sa kanya, napakinabangan niya yung... Sabi nga niya, 'Naging pera pa yung taba ko, kasi may pelikula,'" mahabang kuwento ni Direk Wenn sa PEP.
Ilang shooting days na lang para matapos ang movie?
"Five days na lang. Pero konti-konti na lang. Yung butal-butal na lang."
Ano ang ginawa niya para maging fair ang exposure nina Sharon at Ai-Ai?
"Directive 'yan talaga ng Star Cinema. Kailangan walang magrereklamo sa exposure. Kaya nga, originally, ang alam natin kay Sharon bilang dramatista. Yung comedy niya, may nagko-comedy for her, kunwari may Andrew E na gumagawa ng comedy for her. Ako, initially, ang ano ko, bigyan siya ng kabatuhan, who is Chokoleit nga at si Joy Viado. But it turned out na tumatayo si Mega, binigay ko sa kanya, inalis ko yung dalawa. Kasi tumatayo siya bilang komedyante, e. May timing si Mega. Kaya niyang bumato, nakakatawa siya."
FRIENDS WITH SHARON. Since first comedy film nila ito ni Sharon, ano yung best quality na nakita niya kay Sharon habang ginagawa ang movie na ito?
"Na sobrang game siya. Minsan nga pag pinapanood ng taga-Star Cinema yung rushes, tinatanong nila, 'Direk, paano mo napapayag si Sharon?' Kasi katulad na lang nung eksena sa bus na madi-discover niya kung sino ang kabit ng asawa niya, pagkatapos ng eksena, sinabi sa akin ng AD [assistant director] ko, 'Direk, delikado pala yung ginawa ni Mega na yun, no?' Sabi ko, 'Oo nga,' tapos natawa lang ako.
"'Yan ang laging tanong nila kung paano ko raw napapayag si Sharon. Sabi ko, sinasabi ko lang, tapos ginagawa naman niya. Ganyan ka-professional si Sharon. Ang hindi kasi alam ng mga tao, magkaibigan kami talaga ni Sharon bago pa namin ginawa ito."
Paano ba sila naging magkaibigan ni Sharon?
"Nag-guest kasi ako one time sa Sharon [show ni Sharon sa ABS-CBN]. Nagbigayan kami ng numero. Simula noon, hindi na nag-stop."
Ano ang naging reaksiyon ni Sharon nang malaman niya na may kinalaman ang role niya sa BFF tungkol sa pagiging mataba?
"Diniskas namin sa kanya. Kasi siyempre, Megastar ito. At sobra akong natuwa nang sabihin niya na, 'Direk, totoo naman e.' Pero ang sabi niya, 'Pero magpapapayat ako.' Kaya yun naman ang nagiging problema ko sa continuity nito. Kasi tingnan n'yo ha, yung first shooting day namin na magtutulak siya ng kotse, ang laki niya. Nung kinunan ko recently yung tulak na, ang liit niya. So, talagang ang nangyayari sa amin ngayon, nasa-sandwich yung size niya."
AI AI AND SHARON AS HIS BFF. Paano niya ide-describe si Ai-Ai bilang BFF niya sa totoong buhay?
"Ay, grabe! Sabi ko nga sa iyo e, kahit anong oras... Kunwari, tawagan mo, nandidiyan. Kunwari may dinaramdam akong something, magugulat ka na may ibibigay siya sa iyo, kunwari paborito ko pulvoron ng Goldilocks, tapos may kasama pa 'yong iba. Ibig sabihin, hindi ako nagsasabi sa kanya. Inaalam niya through my friends."
How about Sharon?
"Ang nakakagulat kay Sharon, eto naman...ewan ko, sobra talaga ito. Nagkakakuwentuhan over dinner, kain, kain. Sabi niya, 'Direk, ano ang paborito mong pagkain?' Tapos naalala ko, merong tinapay sa Cagayan de Oro, na sa Cagayan de Oro mo lang mabibili, yung pastel. Tinapay siya na sobrang sarap na may yema sa loob. Sabi ko kay Mega, to die for. Tapos sumunod na shooting namin, five boxes ng pastel! Nagpapunta siya sa Cagayan, balikan, airport to airport. Bumili lang yung tao para dalhin sa akin.
"Tapos sasabihin niya pa sa akin, 'Direk, anong mga pelikula mo ang wala ka?' Kasi alam niya nagko-collect ako ng mga DVD, na original, ha, hindi pirated. Tapos nung sinabi ko, in-order niya. Ano yun, The Promise at The Heiress. Tapos bago pa 'yan, first day ng shooting, lahat ng artista may binili siyang unan, plus electric fan, yung initan ng tubig na sinasaksak mo lang. Ultimo extension cord, kumpleto ang bawat cast. Kasi gusto niya comfortable kaming lahat."
Bilang mga kaibigan, ano ang best na nagawa nina Sharon at Ai-Ai para sa kanya?
"Si Ai-Ai kasi, ang tagal na ng friendship namin. Usaping pera, 'yan, ganung kalalim na yung friendship namin ni Ai-Ai. Si Mega, susubukan ko pa lang, charos!" biro ni Direk Wenn.
Patuloy niya, "Si Mega, yung pagiging Megastar niya, tapos ipinapakita niya sa iyo yung value mo bilang tao, bilang direktor, sobra-sobra na yun."
Nakikita niya ba talaga na puwedeng maging BFF sa totoong buhay sina Sharon at Ai-Ai?
"Oo, kasi magkaibigan na sila dati pa. At saka gusto talaga nila ang isa't isa. Hindi mo lang sila matagalan dahil si Mega ayaw sa mainit; si Ai-Ai, ayaw sa malamig."
After ng BFF, ang susunod na movie na gagawin ni Direk Wenn ay ang Ai Ai movie with former president Joseph Estrada. Sa telebisyon naman ay ginagawa niya ang Precious Hearts Romances episode na pinagbibidahan naman nina Toni Gonzaga at Derek Ramsay. Malapit na rin daw silang mag-resume ng taping ng Habang May Buhay, na pinagbibidahan ni Judy Ann Santos.