Malaking pagbabago raw para kay Marco Alcaraz ang makikita sa kanya sa kauna-unahang independent film na ginawa niya, ang Pitik Bulag under ALV Productions.

First time ngang ginawa ni Marco na pasukin ang mundo ng pagpapaseksi in terms of movies at isa nga sa nakapag-convince daw sa kanya after knowing kung anong klaseng pelikula ang gagawin niya ay ang magiging director niya, si Gil Portes. Besides, nagbiro ito sa presscon mismo ng movie noong June 11, 19 years old na naman daw siya. 

Gaano nga ba siya ka-daring dito? "Siguro ito yung ano, kasi, nakikita n'yo ko hanggang Bench fashion show, naka-underwear, mga ads na naka-underwear. Dito, makikita n'yo ako na may konting butt exposure. At saka mga love scenes kasi, hindi pa ako nakakagawa ng love scenes dati."

Dugtong din niya, "Siyempre, it's a movie of Direk Gil, so, ine-expect mo na magaling siya, award-winning director, so, under him, marami kang matutunan. Then, yung sexy naman, hindi na naman tayo minor, hindi na naman ako bata.

"Bilang artista, gusto kong mag-explore, gusto kong mag-grow. Maging mature. Maipakita ko naman ang ibang side ko."

Marami na ring mga indie movies na nagpapakita ng mga sexy scenes. Paano niya maipapakita ang kaibahan ng Pitik Bulag para masabi niyang may dahilan kung bakit niya ginawa ang pelikulang ito?

"Siyempre, it's under Direk Gil at saka, hindi lang ito puro kaseksihan. Kasi, ang iba, parang may eksenang sexy, nilagay lang. Ito talaga, dahil it's part of the scene."

Isa raw siyang stuntman na family man, pero makakakuha raw siya ng perang ninakaw ng mga bank robbers. In a way, based daw ito sa true story ng bank robbery sa Laguna.

ALL PRAISES FOR CO-STAR. Mag-asawa sila rito ng baguhang sexy star na si Paloma.  At sa isang baguhan, all praises si Marco rito.

"For a newcomer, magaling si Paloma. Ako nga yung bininyagan niya!" natatawang sabi ni Marco. Siyempre, first sexy film ko, so, medyo kinabahan nang konti."

Inalalayan pa siya ni Paloma?

"Hindi naman, actually, tulungan po naman kami sa mga eksena.  First acting niya ito, in a way, may konting tulong din ako sa kanya na ganito ang gawin natin. Actually, tinutulungan ko rin siya sa ibang eksena. Pero yun nga, pagdating sa bed scene, ako ang tinulungan niya," natatawang sabi niya.

Tuloy-tuloy na ba ang pagpapaseksi niya? "Siguro tingnan natin, parang first try lang. Siguro, hanggang doon lang muna. Para makita lang ng mga tao ang kakayahan ko bilang artista."

Pero aminado si Marco na hindi raw mawala ang kaba sa kanya ngayong parang nasa kanya ang pressure sa pagdadala ng movie.

"Siyempre, first starring role ko. Iba pala kapag ikaw na talaga ang bida, kasi mas more pressure.  Gagawin mo talaga ang best mo at kapag hindi nag-click, parang kakabahan ka. Excited na medyo kabado ang pakiramdam ko ngayon," pag-amin niya.