Ikinuwento ni Ruffa Gutierrez na nagkita ang nali-link sa kanyang aktor na si John Lloyd Cruz at ang kanyang mga magulang na sina Annabelle Rama at Eddie Gutierrez sa U.S., sa pamamagitan ng recorded interview sa actress-TV host na napakinggan sa The Buzz kahapon, June 28. 

Ini-record ang interview na ito kay Ruffa noong Sabado ng gabi, June 27, habang nasa Los Angeles, California, ang The Buzz co-host para sa kanyang birthday vacation (birthday niya noong June 24). Nasa U.S. din si John Lloyd dahil isa siya sa mahigit 40 artists ng Star Magic na kasali sa U.S. tour and concert ng naturang talent arm ng ABS-CBN.

Ayon kay Ruffa, na-meet ng aktor ang mga magulang niya na sina Annabelle Rama at Eddie Gutierrez, na sumunod kay Ruffa sa L.A. Ini-reveal ni Ruffa ang pagkikita na ito nina Annabelle at John Lloyd sa Los Angeles.

"Kagabi [June 26], nagkaroon ng Star Magic party sa bahay ng ninang ko sa Los Angeles na invited din si Mommy at si Daddy. So, nagkita-kita sila dun kagabi. Nagbeso-beso si John Lloyd kina Mommy at Daddy. Nagkuwentuhan sila for a while. So, I'm very happy that all's well that ends well," pagsisiwalat ni Ruffa.

HOT ISSUE. Matatandaang ilang linggo nang mainit na pinag-uusapan kung ano ang totoong namamagitan kina Ruffa at John Lloyd. Last week nga, June 21, sa The Buzz, inabangan ng marami ang naging pahayag ni John Lloyd tungkol sa kanila ni Ruffa.

Nang tanungin ni Boy Abunda si John Lloyd ng, "Do you like Ruffa?" Natatawang sinagot naman ito ng aktor ng, "As what?"

Dinugtungan ni Boy ang kanyang tanong ng, "As a girl, as a lady, you know... you like her?" At sinagot naman ito ni John Lloyd ng, "Oo naman."

Marami rin ang naintriga sa naging pahayag ng ama ni Ruffa na si Eddie Gutierrez sa guesting nito sa The Buzz last week din nang tanungin ni Kris Aquino ang tungkol kina John Lloyd at Ruffa.

Tanong ni Kris, "Sa tingin n'yo po ba, bukod sa pagiging magkaibigan, may namamagitan po ba kina Ruffa at John Lloyd?"

Naging makahulugan naman ang sagot ni Eddie na, "Parang may nakikita akong malalim na friendship."

Sa birthday celebration naman ni Ruffa sa Ruffa & Ai last June 22, marami ang naintriga sa controversial statement ng mga anak ni Ruffa na sina Lorin at Venice nang tanungin ni Ai-Ai delas Alas ang dalawa kung sino ba ang paborito nilang aktor? Walang kagatul-gatol na sumagot ang mga bata ng "John Lloyd!" Talaga namang ikina-react ito ni Ai-Ai pati na rin ng mga tao sa studio, na tinawanan na lamang ni Ruffa.

ANNABELLE'S REACTION. Huwebes ng gabi, June 25, na-interview pa ng The Buzz si Annabelle bago sila umalis ng asawang si Eddie papuntang U.S. para sumunod kay Ruffa na nauna nang nakarating sa L.A. Nag-react si Annabelle tungkol sa mga sinabi nina Lorin at Venice.

"Na-shock nga ako, e. Super-shock talaga ako. Pero wala akong magawa dahil mga bata naman yun. Kung ano ang gusto nila, hindi ko puwedeng pipigilan yun. Kaya ride on na lang ako kina Lorin at Venice," sambit ni Annabelle.

Kinontra rin ni Annabelle ang sinabi ni Eddie na may "malalim na friendship" sina John Lloyd at Ruffa.

"Hindi ko nakikita. Yun lang," ani Annabelle.