Patuloy sa pagtulong si Angel Locsin sa mga nasalanta ng mga bagyong Ondoy at Pepeng. At ngayon, sinamahan pa siya ng mga kaibigan niyang artista sa rehabilitation efforts ng Philippine Red Cross (kunsaan siya ang celebrity ambassador)—sa pamamagitan ng  isang website na binuo nila para sa auction ng kani-kanilang mga mamahaling personal items.

"Shop and Share" ang ipinangalan nina Angel, Anne Curtis, Dimples Romana, at Kris Aquino sa website na binuo nila at iba pa nilang mga kaibigan.

"Overwhelming ang response ng mga tao. Nakakatuwa na maraming gustong tumulong," sabi ni Angel nang makausap ng PEP (Philippine Entertainment Portal) sa pamamagitan ng Facebook account niya kaninang hapon, October 20.

Mamahaling items ang mga naka-display at for auction sa www.shopandshare.ph nina Angel, gaya ng Hermes, Prada, Louis Vuitton at Chanel. Nang tanungin ng PEP kung sino ba sa mga celebrity ang nagbigay ng pinakamahal na items, sinagot ni Angel na hindi issue sa kanila kung gaano ba kamahal ang item.

"Ang importante sa amin kung gaano ka-special yung item na yun sa nag-donate," sagot ni Angel.

Heto ang pangalan ng mga celebrity at mga item na ibinigay nila for auction:

Heart Evangelista (Tiffany and Co. ring and Fendi shades), Isabelle Daza (dress creations by Rhett Eala, Debbie Co and Isabelle herself), Pokwang (Louis Vuitton Magnolia Heels shoes), Luis Manzano (Technomarine watches), Kim Chiu (dresses and Louis Vuitton bags), Maxene Magalona (Gucci and Coach bags) Ruffa Gutierrez (Tory Burch bags and shoes), Boy Abunda (Uru Recoleta jacket and Roberto Cavalli glasses), Mariel Rodriguez (Kate Spade, Prada and Marc Jacobs bags), Gerald Anderson (Oakley Eye Patch sunglass), and Marian Rivera (mga classy and expensive dresses na sinuot niya sa mga events at colorful Coach bag). (CLICK HERE and HERE to see photos of their items.)

"Hindi pa namin nakukunan ng pictures yung kay Dingdong [Dantes], pero nag-donate din siya ng personal items niya," balita pa ni Angel.

Dahil puro pagtulong sa mga nasalanta ng bagyo ang pinagkakaabalahan ni Angel ngayon, tinanong na rin ng PEP kung saang relief operations o pagtulong siya nahirapan.

"Bukod sa nahihiya akong humingi ng mga items, nahirapan ako pag nade-deploy ako sa mga urban poor communities. Naawa talaga ako, pag tumitig ka na sa mata ng bata na gutom, may sakit, nakatulala," sabi ng aktres.

Nang tanungin naman ng PEP kung a-attend ba siya sa International Emmy Awards kunsaan nominated siya sa kategoryang Best Performance by An Actress sa pagganap niya sa Lobo, ito ang naging sagot niya: "Hindi pa po ako sure."

Visit www.shopandshare.ph para sa mga gustong makisali sa auction ng mga personal items ng mga artista at makatulong na rin sa mga nangangailangan nating kababayan.