Suzuki Sadatsugu, the latest castaway voted off Survivor Philippines: Palau, reveals what he felt after being voted out in an emotional Tribal Council. "Umiyak ako kasi nag-promise ako sa kanya [his grandmother] na tutulungan ko siya sa business niya. May tindahan kasi siya sa bahay namin sa Tondo. Gusto ko siyang tulungan kapag nanalo ako sa Survivor Philippines. Kaso, hindi nga ako nanalo kaya umiyak ako," he explains.

Photo: Ruel J. Mendoza

Inamin ng latest castoff ng at bagong member ng Jury ng Survivor Philippines: Palau na si Suzuki Sadatsugu na sumama ang loob niya nang pagkaisahan siyang i-vote out ng mga kapwa niya castaways. Ang akala raw niya ay si Justine Ferrer ang matatanggal, pero noong nasa Tribal Council na sila, naramdaman niya na siya ang ibu-vote out.

"Sa umpisa, ang alam ko si Shaun [Rodriguez] ang gusto nilang i-vote out. Kaso nasa kanya nga ang immunity bracelet, kaya naisip ko na si Justine na. Pero noong magbotohan na, feeling ko na kasama ako sa paaalisin  nila. Yun na nga ang nangyari, kasi naligtas si Shaun.

"Oo naman, masama ang loob ko, lalo na sa girls' alliance. Wala na kaming laban talaga kasi tatlo na lang kaming lalake. Si Justine kasi, babae na siya, di ba? Kaya hindi na namin siya puwedeng kakampi. Kaya kami-kami na lang nina Shaun at Charles [de Vera Fernandez] ang pag-iinitan nila.

"Pero after naman akong ma-vote out at masabi ko na ang mga gusto ko, hindi naman nagtagal ang lungkot ko. Kasi nga naisip ko na part na ako ng Jury. Mas okay 'yon kasi kami ang mag-decide kung sino ang karapat-dapat na bagong Pinoy Sole Survivor," kuwento ni Suzuki nang makausap siya ng PEP (Philippine Entertainment Portal) sa Showbiz Central last Sunday, October 25.

Bago tuluyang nagpaalam ay ibinigay niya ang "blood pearl" sa castaway na si Mika Batchelor na makakatanggap ng automatic two votes sa next Tribal Council. Sinabi ni Suzuki na si Mika lang ang tanging choice niyang bigyan nito.

Paliwanag niya, "Si Mika kasi ang leader ng alliance nila, e. Siya talaga ang pinili ko para mabigyan ng blood pearl. We are all playing a game kaya huwag niyang personalin 'yon."

Umiyak nga si Suzuki sa kanyang exit interview pagkatapos niyang ma-vote out. Nabanggit niya ang pangalan ng kanyang lola na si Mrs. Emma Esguerra at nag-sorry siya rito.

"Na-miss ko na kasi ang lola ko. Siya kasi nag-alaga sa akin noong pauwiin ako dito ng parents ko from Japan. Wala akong mga kaibigan dito at ang lola ko lang ang nag-alaga at nagpaaral sa akin.

"Umiyak ako kasi nag-promise ako sa kanya na tutulungan ko siya sa business niya. May tindahan kasi siya sa bahay namin sa Tondo. Gusto ko siyang tulungan kapag nanalo ako sa Survivor Philippines. Kaso, hindi nga ako nanalo kaya umiyak ako. Naalala ko kasi promise ko sa lola ko. Pero alam ko na manalo o matalo man ako, mahal pa rin ako ni Lola at mahal na mahal ko siya," sabi ni Suzuki.

FROM JAPAN TO TONDO. Ipinanganak noong January 10, 1988 sa Gunma, Japan si Suzuki. Isang Japanese businessman ang kanyang ama at Pinay naman ang kanyang ina na dating member ng isang all-female dance group na madalas sumayaw sa shows ng GMA-7.

Sa Japan na lumaki si Suzuki until mag-18 years old siya at pinauwi siya sa Pilipinas para ipagpatuloy ang pag-aaral niya rito.

"Kahit naman noon pang bata ako, umuuwi kami dito for vacation," sabi ng Survivor castoff. "Pabalik-balik kami. Pero noong mag-18 ako, pina-stay na ako dito kasi dito na raw ako mag-aral. May business kasi ang daddy ko sa Japan. Something happened na hindi maganda kaya nalugi ang business. They decided na dito na ako sa Pilipinas magtapos ng college. Hindi na kasi ma-afford ng parents ko ang pag-aaral ko sa Japan.

"Pag-uwi ko nga rito, hindi ako marunong mag-Tagalog. Natuto lang talaga ako sa mga naririnig ko, tapos ginagaya ko. Tinatanong ko sa lola ko kung ano ibig sabihin ng ganitong word. Sinasabi naman sa akin. E, sa Tondo kami nakatira kaya kung anu-anong Tagalog words ang naririnig ko. Unang Tagalog word nga na natutunan ko ay [mura]. Kasi 'yon ang naririnig ko sa kapitbahay. Tapos yung iba mga bastos na words na. Natatawa sila kapag ginagaya ko kasi hindi ko pa alam ang meaning ng mga iyon. Kaya paunti-unti I learned to speak Tagalog. First few months pa lang ako dito, marami na akong naiintindihan at nasasabi na Tagalog words."

Naging working student si Suzuki para makadagdag sa gastusin niya sa pag-aaral ng BS Criminology sa Emilio Aguinaldo College.