Taong 2001 nang maghiwalay sina Gina at ang asawa nitong si Michael de Mesa. At dito nga ay naugnay ang pangalan ni Krista. Sa kolum ni Emy Abuan sa Pilipino Star Ngayon noong 2002, sa presscon ng isang pelikula, hiningan si Krista ng linaw tungkol sa napabalitang relasyon daw nito kay Michael de Mesa, pero kaagad namang pinabulaanan ng aktres ang intriga.

Tahimik naman ang kampo ng boyfriend ni Krista na si Direk Dominic Zapata. Ayon naman sa ilang sources, hiwalay na raw ang direktor at ang aktres.

Upang mabigyang linaw at matuldukan na ang lahat ng espekulasyon, sinubukang kontakin ng The Buzz si Krista. Ngunit walang sagot mula  sa kampo ng aktres.

JINKEE'S TEXT MESSAGE TO KRIS. Pagkatapos ng VTR news na ito ay nagbigay ng komento tungkol sa isyu ang The Buzz hosts na sina Boy Abunda, Ruffa Gutierrez, at Kris Aquino.

Ayon kay Ruffa, na ang parents na sina Eddie Gutierrez at Annabelle Rama ay nasa Las Vegas para sa laban ni Pacquiao, nandoon daw talaga si Krista with her family. Pero hindi niya raw sigurado kung saang hotel ito nag-i-stay, pero siguro raw ay sa Luxor Hotel.

Bumilib daw si Ruffa sa asawa ni Manny na si Jinkee dahil, ayon sa kuwento ng kanyang Mommy, sa kabila ng intriga ay ginampanan pa rin ni Jinkee ang pagiging isang "dutiful wife" na pinagsisilbihan si Manny.

Isang text message naman mula kay Jinkee ang natanggap ni Kris. Pinabasa niya pa ito kina Boy at Ruffa. Ayon kay Kris, shocking daw talaga ang laman ng text na ito kaya hindi puwedeng sabihin on air. Kinumusta pa raw niya si Jinkee kung okay daw ito at ang text back nito ay mag-uusap daw silang mag-asawa after the fight with Cotto.

Binantaan naman ni Kris sina Boy at Ruffa na ang pinabasa niyang text ay between the three of them lang at kung kumalat daw ito ay alam na ng mga tao kung sino ang nagkalat.

Hihintayin na lamang daw nila ang pagbabalik sa bansa nina Manny at Jinkee upang ang mga ito ang magbigay-linaw tungkol sa intrigang ito. Bukas din daw ang programa nila para sa paliwanag ni Krista.

Ayon naman sa ilang sources ng PEP na nasa Las Vegas, nagkaroon daw ng matinding away sina Manny at Jinkee bago ang laban ng Pambasang Kamao. Nalaman daw kasi ni Jinkee na pumunta si Manny sa hotel room ni Krista noong gabi ng November 13 (U.S. time).

Hindi rin daw nagpa-interview si Jinkee sa media. Nagkulong lang daw ang misis ni Pacquiao sa VIP room ng Mandalay Bay.