After six years, nakabalik sa music scene si Jessa Zaragoza in 2009. Walang dudang magtutuloy-tuloy na ang mga plano nila ng mister na si Dingdong Avanzado to re-establish their respective careers.
Naging matagumpay ang Jessa Sings the Great Musical Icons album na ni-release last year, at si Dingdong naman ay naghahanda na sa kanyang pagbabalik via a new album na definitely lalabas sa 2010.
"All English songs ang naroroon, at ang susunod na album ko, kung ano yung inire-request na ng fans ko, yung bagong album talaga with new compositions na puro Tagalog," sabi ni Jessa.
May bonus attraction na minus-one version ang comeback album niya na nakatulong para maging hit ito.
NO PROBLEM WITH RACHEL. Very positive nga ang pagbabalik ng mag-asawa. Naging visible sila, at humupa na rin kahit papano ang kung anu-anong tensiyon at kontrobersiyang pinagdaanan nila.
"Iba na rin kasi yung status ko, nanay na ako," paliwanag ni Jessa. "Malaki na talaga ang pagbabago. Hindi na yung konting bagay lang, nagre-react na ako. Wala na lahat yun, lalo na't New Year na.
"Isa 'yan sa maipapangako ko talaga na hangga't maaari, iwas kami ni Dingdong sa ganyang mga bagay, at kung hindi talaga maiiwasan, haharapin na lang namin with so much positivity. Alam naman ninyo ang showbiz."
Sa tagal na rin ng dalawa, super secure na si Jessa kay Dingdong. In fact, kung may mga nagpaplano ng projects na pagsamahin si Dingdong with Rachel Alejandro or Rufa Mae Quinto, na parehong ex-girlfriends niya, walang magiging problema kay Jessa.
"Naku, wala na! Kami nga ni Rachel, nagkasama na sa isang concert. Successful yung Ladies of the '90s namin. Sila ni Dingdong, nag-tour pa sa Australia for a series of performances. Okey kami ni Rachel. Hindi kami close, pero nagkakaintindihan kami, walang problema sa amin," ani Jessa.
Last year ay kumalat ang balitang naghiwalay ang mag-asawa at nasangkot si Rachel bilang "third party," bagay na agad na pinabulaanan nina Jessa at Dingdong.
"RESPETUHAN NA LANG." Tungkol kay Rufa Mae, "Tahimik na kami kaya respetuhan na lang yun," ang sabi ni Jessa.
"Para sa akin, nasabi ko na ang mga gusto kong sabihin, at kung hindi man kami nagkakausap pa, by all means, sure naman ako na isang araw, magmi-meet kami at magkakausap na parang walang nangyari, dahil para sa akin, wala na yun, tapos na," paglilinaw ng singer-actress.
Matatandaang nagkaroon ng alitan sa pagitan ng sexy comedienne at ng mag-asawang Jessa at Dingdong dahil sa interview na binigay ni Rufa Mae sa YES! magazine noong Pebrero 2008, kung saan dinetalye ng aktres ang kanyang makulay na lovelife. (CLICK HERE for related article.)
Wish lang ni Jessa na sa 2010, wala na yung ganyang tila walang katapusang isyu sa kanila ni Rufa Mae. Darating din daw ang araw na talagang matatapos ito at malalagyan ng tuldok.
"Ako kasi, hindi ako mangingiming lumapit sa kanya, pero nasa tamang sitwasyon 'yan. Mangyayari 'yan nang kusa at hindi pilit," sabi pa ni Jessa.
BALIKBAYANS. Mas gusto pa rin daw nina Jessa dito sa Pilipinas. Iniintriga silang mag-asawa na wala naman daw kasing nangyari sa kanila sa States kaya nagsusumiksik sila rito.
"Hindi naman kami nagsusumiksik," natatawang sabi ni Jessa. "Pilipinas pa rin ang bansa namin. Bakit kami hindi babalik dito? Ang nangyayari nga, any time na gusto namin, nakakabalik kami sa U.S., lalo na't nasabi nga namin na mayroon kaming pinapatakbong business sa Guam, na kailangang asikasuhin din namin.
"Hindi na lang namin iniintindi yung sinasabi ng iba. Kasi, kami ni Dingdong, ginagawa namin ang lahat para makapamuhay nang kumportable kaya may mga isinasakripisyo rin kami, gaya ng mahaba-habang panahong pagkawala sa Pilipinas. Pero, mas gusto pa rin namin dito. Naririto ang mga kamag-anak namin, mga kaibigan, masaya rito, e.
"At saka lalong napamahal sa akin yung mga katulong namin at driver. Kasi sa Amerika, walang mga ganyan. Kami-kami ang gagawa sa bahay," sabi ni Jessa.
Mas okey kay Jessa na magkaroon ng proyekto sa TV na hindi pangmatagalan, gaya ng Rosalinda na nagtatapos.
"Hindi na rin uso yung pahabaan ng teleserye, kaya mas gusto ko. After a project, nakakabalik kami sa Amerika. Okey na sa akin yung papuslit-puslit na one or two weeks sa U.S., 'tapos, babalik dito. Kaya feeling ko, magtutuloy-tuloy kami ni Dingdong," pagwawakas ni Jessa.