Naimbita ang PEP (Philippine Entertainment Portal) sa first taping day ng "Almost A Love Story"episode ng Dear Friend na mag-uumpisang mapanood sa January 31, after SOP. Sa Fontana Resort sa Clark, Angeles, Pampanga ginawa ang three-day taping ng episode sa direction ni Topel Lee.
Tampok sa bittersweet love story ng GMA-7 ang tambalan nina Rhian Ramos at TJ Trinidad.
"Incestuous," ang pabirong tawag ni Rhian sa tambalan nila ni TJ dahil magkapatid sila sa pelikulang The Promise na first movie ng actress, pero sa Zorro at Stairway to Heaven, laging may pagnanasa sa kanya si TJ.
Ikinuwento sa PEP ni Mona Mayuga, executive producer ng Dear Friend, ang buong plot ng "Almost A Love Story," pero bawal isulat, basta panoorin ninyo at ma-i-in love at maiiyak kayo sa ending, aniya.
MAY-DECEMBER AFFAIR. "Siguro," ang sagot ni TJ sa tanong ng PEP kung bini-build-up sila as a loveteam ng GMA Network, at "Siguro dahil sunud-sunod ang project namin," ang sagot naman ni Rhian. Pati nga indie film na Saving Sally, magkasama rin sila nang madagdag si Rhian sa cast.
"What I like in my role here in 'Almost A Love Story,' for the first time younger sa age ko ang role ko. Magsisimula ang story na 16 years old ako. Sa past projects ko, laging older ang age ko sa real age ko, masaya ito," banggit ni Rhian.
Ayon naman kay TJ, risky theme ang episode nila ni Rhian, May-December affair ito at palalabasin namang 24 years old siya sa pagsisimula ng relasyon nila.
"Gusto ko ang takbo ng love story namin ni Rhian dito na harmless sa umpisa, may mga kumontra hanggang sa ending na tragic. Ang gusto naming ma-achieve rito ay mangibabaw ang emotion ng viewers kahit may age gap ang karakter namin. This is something to look forward to at sana magustuhan ng tao," aniya.
DOING IT RIGHT. Ipinagmamalaki ni TJ na comfortable sila ni Rhian at kahit ano ang ipagawa sa kanila, kahit kissing scene ay kanilang gagawin.
"This is what we have to do and let's do it right. Kung may ipagagawa si Direk, gawin natin para hindi paulit-ulit. Yun ang approach namin pareho at gusto rin naming nagtatrabaho kami."
Tanong namin, posible bang ma-in love si TJ sa isang mas nakababatang babae?
"Yeah! It depends on the level of maturity ng girl. I could be in love with a younger or older woman. Depende if you see eye to eye."
How young ang girl na puwede niyang magustuhan?
"Theoretically, anything is possible. I know a couple na 17 years ang age gap and they're happy together. But for me, if a girl is 15 years old, I wouldn't even look twice, lalagpasan ko ng tingin. But 18 years old, I've been there while I was in college. Right now, I'm not looking for something like that. I like my woman smart and funny and my GF is like that, smart and funny," pahayag ni TJ, na matagal nang may relationship sa isang di taga-showbiz.
FAN HOPE FOR TJ & KRISTINE . May fans sina TJ at Kristine Hermosa na nagre-request for a reunion project, pero malabo itong mangyari sa ngayon dahil sa ABS-CBN nakakontrata ang actress at sa GMA Network naman nakatali si TJ.
"Posible pa rin kaming magkatambal ni Kristine, pero indie film. Sa indie film, less ang limitations and that's probably the only way we can team up again," pahayag ng aktor.
Samantala, ayaw nang mag-react ni Rhian sa isyu sa kanila ni Marian Rivera dahil para sa kanya, matagal nang tapos yun at inulit niyang wala silang away lalo na kung si Dingdong Dantes ang magiging dahilan.
"Willing akong makatrabaho si Marian at sayang nga dahil di ako natuloy sa Show Me Da Manny dahil mataas ang lagnat ko. Wala rin kaming isyu ni Dingdong. Basta ang alam ko, sa asaran namin sa taping ng Stairway to Heaven, pikon siya!" birong pahayag ni Rhian.