"Sa ngayon, hindi pa ako mawawala doon kasi previous commitment ko na yun. Yun kasi ang napag-usapan namin bago ako pumirma ng exclusive contract. Kasi ang kontrata ko rito, two years. So, sabi ko sa kanila, 'Ma'am, may napirmahan na akong iba bago pumunta dito. Puwede po bang tapusin ko na muna yun?' Isa na lang ang show ko doon, yung Kiddie Kwela."

VERSUS SHOWTIME. Kumusta na yung daily show na may dating titulo na Todo Bigay na pagsasamahan sana nila ni Manny Pacquiao?

"Tuloy na po yung daily show," pagbabalita ni Bayani. "Nag-dry run na kami ng mga anim na beses na. Ang airing namin ay sa February 8 na. Tuloy na tuloy na. Pero hindi na Todo Bigay ang title niya. Hindi ko pa puwedeng sabihin kung ano yung ipinalit na title. Basta abangan niyo."

Nanghinayang ba siya na hindi natuloy ang pagsasama nila sana ni Manny?

"Ako kasi, ang pakiramdam ko lagi pag hindi talaga ukol, hindi bubukol, e. Pagka hindi sa iyo, hindi para sa iyo, e."

Sino na lang ang naiwan from the original cast nito?

"Ako na lang ang naiwan sa original cast," sagot ni Bayani. "Hindi ko pa puwedeng sabihin kung sino yung mga makakasama ko kasi sinabihan ako na hindi pa puwedeng sabihin."

Ano ang feeling na tatapatan ng daily show nila ang Showtime ng ABS-CBN?

"Nakakanerbiyos kasi alam naman natin ang rating nun, e. Pero siyempre, ang sinasabi nga namin kapag nagmi-meeting kami, 'Huwag nating isipin na tinatapatan natin sila. Isipin natin na nag-e-enjoy tayo at nagbibigay ng tuwa at kasiyahan sa mga tao.'"

Pareho rin ba sila ng format ng Showtime na talent show?

"Actually, yun naman talaga ang trend ngayon, e."

Paano nila gagawing kakaiba ang show nilang ito?

"Dapat yung hindi napapanood sa ibang istasyon," sagot ni Bayani.

Dahil co-production ito ng GMA-7 at  ng TAPE Inc., na producer ng Eat Bulaga!, magkakaroon daw ng host mula sa TAPE.

FIRST TIME. Samantala, gagampanan ni Bayani sa First Time ang role ni Raffy Santiago, na ninong ni Lucas, played by Joshua Dionisio.