Expected na kapag napag-uusapan ang tungkol sa Superstar na si Nora Aunor ay hindi puwedeng hindi hingan ng reaksiyon ang kanyang pinakamagipit pa ring karibal sa showbiz industry—ang Star for All Seasons na si Vilma Santos.

Usap-usapan kasi ngayon ang nalalapit na pagbabalik ni Nora sa Pilipinas upang i-resume ang kanyang showbiz career. Pero bago rito ay naging laman ng balita ang pagpaparetoke ng mukha ng Superstar sa Japan.

Sa presscon na ipinatawag ni Mother Lily Monteverde para kina Vilma at sa asawa nitong si former Senator Ralph Recto kagabi, March 3, ay tinanong ang Star for All Seasons kung ano ang reaksiyon niya sa pagpaparetoke ng mukha ni Nora.

"Hindi lang naman ang kumare ko ang gumawa niyan, marami pang iba," sabi ni Vilma. "Not for anything, mas bata sa amin, nagpapaayos na. There's nothing wrong with that. Kung sa tingin mo, e, kailangan na, bakit naman hindi? Walang masama na i-enhance mo yung beauty mo, di ba?"

Welcome na welcome naman daw kay Vilma ang pagbabalik ni Nora sa bansa sa April.

"Oo naman!" bulalas niya. "At saka noong magkaroon kami ng premiere night sa L.A. ng In My Life, nagkakausap kami niyan. Dapat nga manonood siya, e. Kaya lang, biglang nagkaroon ng bisita sa kanila. Kaya ang pinapunta niya, mga close friends niya, which we accommodated, at nag-thank you siya."

Sa isang episode ng Wowowee kung saan nag-guest si Vilma ay sinabi niya kay Nora, through phone patch, na pag-uwi ng huli ay susunduin niya ito sa airport. Tutuparin ba niya ang pangako niyang ito kay Nora ngayong malapit na itong bumalik ng Pilipinas?

"Kapag tinawagan niya ako, susunduin ko siya at dadalhin ko siya sa Batangas!" natatawang sabi ni Vilma. "Pero alam niya, alam niya ang number ko."

Sa hiwalay na interview kay Nora ay sinabi niyang payag siyang gumawa ng pelikula with Vilma. Si Vilma ba ay gustong makasamang muli sa pelikula ang kanyang archrival?

"Sa totoo lang, gusto kong gumawa ng movies. Ang daming naka-lineup. But again, ang nangyayari ngayon, priority is... Tinitira na nga ako! Hindi raw 24 oras [na nagtatrabaho]. I mean, after seven years, why not? Maybe later on, pagdating niya. Pero ngayon, yung priority kasi is still as public servant. That's my second priority after my immediate family," paliwanag niya.

Sa mahigit apat na dekadang pagiging magkaribal nila ay tatlong pelikula pa lang ang pinagsamahan nina Vilma at Nora. Ito ay ang mga sumusunod: Young Love (1970), Ikaw ay Akin (1978), at T-Bird at Ako (1982).

ACTING AWARDS. Sa Imperial Palace Suites sa Tomas Morato ginanap ang presscon para kina Vilma at Ralph Recto kagabi. Pero bago nagtungo doon ang mag-asawa, kasama ang kanilang anak na si Ryan Christian, ay nanggaling muna si Vilma sa awarding ceremony ng Gawad Tanglaw Awards. Siya kasi ang nahirang na Best Actress para sa pagganap niya sa In My Life (2009), samantalang ang panganay niyang anak na si Luis Manzano ang nanalong Best Supporting Actor para rin sa naturang pelikula.

Bagamat madalang nang gumawa ng pelikula si Vilma ay patuloy pa rin itong tinatangkilik ng mga mananood at patuloy pa rin ang pagtanggap niya ng acting awards. Dahil dito, hindi kaya lalo niyang ma-miss ang showbiz ngayong masyado na siyang abala sa pulitika?

"Nami-miss ko talaga, sa totoo lang," pag-amin niya. "Pero wala, I'm here now as a public servant. Ang kapalit na lang nito, yung alam mong tiwala, suporta, pasasalamat sa 'yo ng tao, yun naman ang hindi kayang bayaran ng pera. Once na nandun ka na at nakikita mo na yung kanilang pagmamahal sa 'yo, suporta at pasasalamat na nanggagaling sa puso, yun na ang pinakabayad mo dun, yun na ang legacy mo. Sa akin, okey na bayad na yun. The trust, the support, the love at pasasalamat nila sa nagawa mo sa kanila, bayad ko na yun, at tinatanaw ko na malaking utang na loob sa mga Batangueño."

Masaya rin si Vilma sa pagwawagi ni Luis ng kanyang kauna-unahang acting award.