Kung tutuusin, si Eugene Domingo na yata ang isa sa busiest actresses sa local showbiz ngayon. Gayunpaman, hindi raw nito tinanggihan ang offer para makapag-guest sa isa sa top-rating series ng Kapuso network, ang First Time.

Iba raw kasi ang dating sa kanya ng show at mga batang part ng cast. "Refreshing," as Uge described it.

"Nakakahawa yung kanilang passion, 'di ba? Parang wala silang inisip na ibang gagawin. Parang wala silang problema. Parang naka-focus lang sila sa ginagawa nila. Yung pilot nila, ang ganda-ganda.

"Ikinuwento nga sa akin ni Direk Andoy [Ranay] yung lahat ng experience on and off cam.  Natuwa ako. Parang gusto ko rin ma-experience yung mga bata. Sila Barbie [Forteza], sila Joshua [Dionisio].  Alam mo yun, fresh? Parang gusto mo rin ng fresh."

Susulpot-sulpot daw siya sa mga susunod pang episodes ng First Time as Barbarella Buncalan Jackson, ang guidance counselor ng school.

"Hindi naman kasi matatapos ang mga problema ng mga bata, parang tinutuwid mo lang. E, kasi kung nakakanood kayo, pati mga teachers may problema!  So, dapat lang na mapanood sa TV na may magsasabi na kung ano ang dapat makita ng mga bata, so, susubukan ko sanang ako yun," hirit pa niya.

Si Direk Andoy ang nagdugtong na si Uge raw ang word of wisdom ng show.

"Talbog! Ha ha ha," reaction naman ng Comedy Empress..

UPCOMING PROJECTS. Mapa-telebisyon o pelikula, busy ang komedyante. Magtatapos na ang Hot Mama at ang Cool Center.  Pero may sisimulan siyang show na Comedy Bar sa GMA-7, kasama sina Allan K at Fabio Ide.

Sa pelikula naman, malapit nang ipalabas ang Working Girls at kasalukuyan naman niyang sinu-shoot ang Here Comes The Bride. Malapit na rin daw simulan ang part 2 ng Kimmy Dora.

"Tinitingnan namin kung magsisimula kaming mag-shooting ng June kasi yung script, matatapos ng May. So, as soon as lumabas yung script, magsu-shooting na kami agad. Yung Here Comes The Bride, showing nun sa June."

Kung tutuusin, solong katawan halos si Uge dahil sa desisyon niyang huwag na ngang kumuha ng manager. Mas effective ba sa kanya ang ganitong set-up?

"Well, nagkataon lang din naman na after Kimmy Dora, dumagsa. At nagkataon din lang na gustong-gusto ko. Talagang mas doble yung kagustuhan ko na gumawa ng pelikula ngayon at sumubok ng kung ano-ano pa. Parang mas ganado ako, mas na-inspire ako, ganun."

NO TIME FOR LOVE. May diin ang pagkakabanggit ni Uge sa pangalan ng Brapanese actor na si Fabio Ide, nagsimula tuloy ang tuksuhan.

"Huwag na kasing kaiinggitan, sabihin na lang natin na gawin na lang na inspirasyon," natatawa niyang sabi.  "Okey siya, ano?  Si Fabio...mabait siya at saka, nakakasakay siya. Nag-aaral siyang mag-Tagalog at saka, maganda ang sense of humor."