Nilinaw ni Jason Abalos na bagamat magkatambal sila ni Andi Eigenmann sa primetime series na Agua Bendita, imposible umano na mas lumalim pa ang kanilang pagkakaibigan

Para sa binatang aktor, malapit na kaibigan lamang ang kanyang turing sa dalagang anak ng award-winning actress na si Jaclyn Jose, na nakatrabaho naman niya sa Nagsimula sa Puso (2009)

Nang tanungin kung ano ang kanyang gagawin kung sakaling mahulog siya kay Andi, natatawang sagot Jason, "Kailangan munang ipagpaalam kay Mama Minda [Jaclyn's role in Nagsimula sa Puso]."

Ayon kay Jason, napag-usapan na nila noon ni Jaclyn ang pagsasama nila ni Andi noong ginagawa pa lamang nila ang dating afternoon teleserye. 

Kuwento ni Jason, "Kasi noong nasa Nagsimula sa Puso pa lang kami, hindi pa kami tapos, nalaman namin na gagawin namin itong Agua Bendita. Sabi niya, 'Oy, aalagaan mo ang anak ko, ha? Babantayan mo 'yan.' Sabi lang niya, 'Bantayan mo lang.' Parang, siguro, 'Alalayan mo lang.'"

Nabanggit ni Jason na ngayong Holy Week, nagpaplano ang kanyang mga dating kasamahan sa Nagsimula sa Puso na isang get-together. Pagkakataon na kaya ito upang mas mapalapit sa kanyang leading lady at sa ina niya?

"Kung ibibigay 'yon, binigay ng pagkakataon," matipid na sagot ni Jason.

Pero dagdag niya, mahirap na lumigaw ngayon sa 19-year-old actress dahil pausbong pa lamang ang kanyang showbiz career. "Kung darating ang time. Pero ngayon kasi, ang ganda ng takbo ng career niya, e. Parang ang hirap harangin, e. Ang hirap 'yong ikaw ang maging dahilan para masira, di ba?"

STILL MAJA. Sa kabila ng pagkakaroon ng panibagong ka-love team, hindi pa rin naitanggi ni Jason na mas lamang pa rin sa puso niya ang dati niyang kapareha na si Maja Salvador.

Minsan na ngang na-link ang dalawa sa isa't isa ngunit hindi naman ito nauwi sa isang tunay na relasyon.

Ayon sa 25-year-old aktor, minabuti niya muna na mag-focus sa kanyang showbiz career bago bigyan ng pansin ang lovelife. Aniya, "Siguro, hindi lang para sa akin. Gusto ko din pero hindi naman ako nagmamadali. Kung talagang para sa akin, para sa akin."

Patuloy pa niya, "Ito palang trabaho, kumbaga, binigay ng Diyos sa akin, sobrang pagpapasalamat, e. Hindi na ako humihingi ng kung ano pa. Kung ibigay man 'yong, kunwari, lovelife, parang bonus na 'yon.  Sobrang suwerte ko na kapag sa career okay ka, sa lovelife okay ka pa rin."

Ayaw niya rin umano na maging dahilan ng posibleng pagkaudlot ng kasikatan nila ni Maja kung magkaroon man sila ng relasyon. Ito ang dahilan kung bakit tila matagal-tagal nang walang balita tungkol sa lovelife ni Jason. 

Paliwanag niya, "Para kasi nagsisimulang artista [pa lang siya noon]. Ako rin, nagsisimula, iniisip ko rin ang career ko. Sila din, mas iniisip nila ang career nila kasi mga babae sila. Parang kapag pinasok ko 'yon, tapos masira ang career nila, ako pa ang masisisi."