Tuluy-tuloy ang workshops ng Final 14 ng StarStruck V kahit medyo matagal nang natapos ang reality-based artista search na ito ng GMA-7. At ito nga ang pinagkakaabalahan ngayon ng First Princess na si Diva Montelaba, bukod sa weekly musical-variety show na Party Pilipinas.

"Right now, super hectic yung schedule namin sa workshop–hosting, acting, dancing. Yun, wala pa masyado [ibang projects]," banggit ni Diva nang makausap siya ng PEP (Philippine Entertainment Portal) last Friday, April 16. Bumisita kasi si Diva at ang lahat ng StarStruck V graduates sa opisina ng Summit Media sa Mandaluyong City noong araw na yun para sa meet-and-greet with the editors of Summit magazines.

Bagamat hindi pa siya masyadong abala sa kanyang showbiz work, sinabi ni Diva na malaki na ang ipinagkaiba ng buhay niya mula noong nasa Cebu pa siya at noong nasa competition pa sila.

"Ay, sobra!" bulalas niya. "Siguro kung ire-rate ko, 100 percent na sobrang nag-iba. Kasi ano, before nung nasa StarStruck pa ako, ang akala ko lang showbiz is all about fun, making money, working. Pero I found out na it's not really all about that. Parang paglabas ko sa totoong mundo ng showbiz, parang ganito pala siya, kailangan mong malaman paano ilagay yung sarili mo sa tamang lugar. Mahirap din, mahirap. Siguro dahil nag-uumpisa pa lang ako, pero tingnan mo, ine-enjoy ko pa rin.

"Hindi ko lang alam kung hanggang kailan 'tong pag-e-enjoy kong ito!" natatawa niyang pahabol.

Hindi pa ba niya nararanasang mapuyat sa taping?

"Meron na din kasi merong mga guestings, e, hindi nga lang regular. Meron naman, pero I'm getting ready for those puyatan," sabi ni Diva.

DIVA ON DIVA? Aside from Party Pilipinas, anong klaseng show niya gustong makasama?

"Siguro po yung teleserye," sagot ni Diva. "Gusto ko yung maging kontrabida. Well, lalong-lalo na maging bida."

Kontrabida?

"Oo, kasi nung ginawa ko yung 'Kontra Diva' [artista test sa StarStruck V] with Pauleen Luna, yung sobra talagang may action na ng pagiging kontrabida, parang 'andami kong compliments na natanggap. Sabi ng mga tao, 'Bagay ka talaga diyan.' Pero napi-feel ko talaga na mas kaya ko siyang gawin.

"Pero naniniwala ako na meron pa akong puwedeng gampanan na roles. So, yun, gusto kong mahasa yung acting skills ko. So, kung bibigyan man ako ng projects, gusto ko yung sa mga teleserye, yun na yung puyatan talaga. Gusto ko rin yun," paliwanag niya.

Sa mga existing shows ng GMA-7, saan niya gustong makasali?

"Gusto kong makasama sa Diva kasi nakausap ko personally si Ate Reg [Regine Velasquez]. Ang bait niya, grabe! Tapos yun, napag-usapan din naming yung about sa pagsali ko sa Diva. So, sana talaga matuloy," asam ni Diva, na tila bagay nga sa napili niyang show dahil sa pangalan pa lang niya.

STEVEN & SARAH. During the StarStruck V competition, naging open sina Diva at Steven Silva, na nanalong Ultimate Male Survivor, tungkol sa nararamdaman nila sa isa't isa. Ngayong tapos na ang StarStruck V, kumusta na sila ni Steven?