Total victory talaga para sa pamilya Revilla ang naging resulta ng nakaraang May 10 elections. Hindi lang nanalo si Bong Revilla sa Senado, siya daw ang nakakuha ng pinakamataas na boto in election history. Sa official canvass ng Comelec, Senator Bong has already garnered nearly 19.5 million votes.
Ang asawa naman niyang si Lani Mercado ay ang bagong halal na congresswoman ng 2nd District of Cavite, at ang kapatid na si Strike Bautista ay muling nahalal bilang Mayor ng Bacoor.
Kahapon, June 4, ay humarap ang mag-asawang Bong at Lani sa entertainment press, kabilang na ang PEP (Philippine Entertainment Portal), sa Imperial Palace Suites sa Quezon City. Kasama sa victory press conference ang Regal matriarch na si Mother Lily Monteverde, isa sa mga nag-endorso sa mag-asawa noong kampanya.
BREAK FROM SHOWBIZ. Ngayong nahalal na si Lani, sinabi niyang ipapahinga niya muna ang kanyang showbiz career.
"Wala muna. Focus muna 'ko sa bagong trabaho ko," nakangiting sabi niya. "Para wala rin namang masabi ang constituents ko, trabaho muna talaga, kasi yun din naman ang ipinangako ko sa kanila. Sila muna ang pag-uukulan ko ng pansin."
Balita niya'y meron na nga raw na-turn down na project ang manager niyang si Lolit Solis.
May planong mag-enroll sa kursong Public Administration si Lani habang nasa Kongreso.
"Batikan ang mga kasama ko," sabi niya. "Basta ang ipinangako ko sa entablado, ang pag-uukulan ko ng pansin yung una, ang municipal hospital namin sa Bacoor na ginagawa. Gagawan natin ng paraan na maging district hospital ito para national government na ang tutulong sa amin.
"Popondohan ko ang mga major hospital. Nandiyan ang mga scholarships na ipinangako ko sa mga constituents ko at yung construction of new school, dun muna."
Isa rin sa main goal ni Lani ay ang maipasa ang pagiging siyudad ng Bacoor.
FAMILY FIRST, FOR NOW. Habang di pa raw siya pormal na nauupo sa Kongreso, talagang ang pamilya niya raw ang pinaglalaanan niya ng panahon.
"Ngayong hindi pa nagsisimula, quality ang ibinibigay ko sa mga bata. Kasi, once I start working in Congress, hindi ko pa alam kung ano ang magiging sistema. Pero nandiyan pa rin naman ang bago umalis, naka-monitor sa mga bata.
"But once I have work in the Congress, gano'n pa rin. Kahit kapag taping naman, nate-text at natatawagan pa rin ako ng mga bata. Huwag lang during session."
Father's Day na sa June 20. Pareho nang busy sa kani-kanilang tungkulin bilang mga public servant sina Bong at Lani, pero may plano ba silang i-celebrate ang natatanging araw na ito?
"Parang walang bakasyon si Senator. Baka wala siya sa Father's Day. Wala pa akong alam. Hindi pa namin napa-finalize lahat ng plans. Pero ako kasi... June 19, mag-a-attend ako ng wedding ni Tuesday Vargas sa Boracay.
"Ninang ako at ninong din po siya. Pero, baka nga wala na siya by that time, baka ako na lang ang mag-a-attend."
Kaka-celebrate naman nila ng kanilang 24th wedding anniversary.
"Masaya naman. Simple lang. Dinner with the family. Kasama siyempre sina Ynna at Vince [del Rosario] dahil anniversary rin nila. But the following day, we had separate celebrations."
Wala na raw silang mga ine-expect na pang-anniversary sa isa't isa. Pero ang advanced anniversary gift na ibinigay niya kay Bong ay ang everyday bag na ginagamit ng senador, at siya naman, ang hiningi lang daw niya ay laptop at attaché case. "Preparation for work," nakangiti niyang sinabi.
Nagsi-sink in na ba sa kanya ang pagiging congresswoman?
"On the actual day itself, iba pa rin ang scenario. Ngayon, planning stage pa lang. Nagsi-sink in slowly kasi nando'n na ang preparation. Pero kapag nandiyan na ang posisyon, ibang sitwasyon na naman 'yan. So, I have to learn from my mentors in Congress. Ang dami nilang mahuhusay."
RENEWING VOWS. Next year, sa May 28, ay silver wedding anniversary na nila, at may naiisip na raw si Lani kung paano nila ito ise-celebrate.
"Nagko-contemplate ako on going back where we had our first wedding, sa Glendale, California. Actually, it is a church inside a mortuary. Pero diyan ikinasal si Ronald Reagan and Jane Wyman, sa unang-una niyang asawa.
"Nagkataon na dun kasi in-arrange ng tatay-tatayan ni Bong dati. Siguro I want my kids to see. Sana existing pa yung church. So, pag-alis ni Bong, ipari-research ko sa kanya kung nandun pa yung church."
Gusto raw ni Lani na mag-renew ng marriage vows doon.
"Parang gusto ko ulit imbitahan kung sino ang mga kasama namin noon, although wala na yung ibang ninong at ninang namin kasi they passed away already. Pero, gusto kong ma-experience naman ng mga anak namin kung ano ang nangyari."
Dugtong pa niya, "Actually, plano pa lang. Maaaring magbago. Gusto ko lang na parang romantic ang idea na gawin mo ulit where you had it for the very first time."
SECRET OF STEADFAST RELATIONSHIP. Sa loob ng 24 years nilang pagsasama, masasabing napakarami na nilang intrigang pinagdaanan, and yet nananatili silang buo. Kaya naman sa tuwi-tuwina, natatanong si Lani kung ano ba ang sikreto nilang mag-asawa?
"Bilang isang maybahay, siguro, ine-emulate ko ang mother-in-law ko. Nandiyan din ang pagtingin ko sa pagsasama ng mga magulang ko. Nandiyan din ang paghanga sa matatagal na marriages na sa industriya... Isa sa na-interview namin na matagal nang nagsasama ay si Robert Arevalo at saka si Barbara Perez, isa sa matatagal nang relationship."
Sa huli, tinanong namin si Lani kung ano ang reaksiyon niya sa balitang mukhang in love na naman ang anak na si Jolo Revilla.
Nangiti lang si Lani sabay tanong kung wala pa raw ba ang anak sa naturang victory party. Aniya, "Wala ba si Jolo rito? Puwede bang siya na lang ang tanungin n'yo?" natatawa niyang sabi.
"May alam lang ako nang konti, pero siguro, ibigay natin 'to kay Jolo," ang huli niyang sinabi sa interview.