Parehong Pinoy adaptation ng sikat na Koreanovelas ang magkasunod na project ni Dingdong Dantes sa GMA-7. Mula sa Stairway to Heaven with Rhian Ramos, ang Endless Love naman ang ginagawa ngayon ni Dingdong kung saan kapareha niyang muli ang kanyang girlfriend na si Marian Rivera.

Kaya naman itinuturing ni Dingdong na isang malaking challenge ang pagganap niya bilang Johnny sa Pinoy version ng Endless Love. Una itong ginampanan ng Korean actor na si Song Seung Heun, na isa rin sa mga artista ng upcoming Koreanovela na East of Eden na ipalalabas sa Kapuso network.

"Mas challenging din siya sa akin dahil dikit na dikit, sobra," sambit ni Dingdong. "Pero siyempre, nababalanse siya dahil then again, bago ang aming director [Mac Alejandre]. Kumbaga, iba rin ang atake niya. Iba rin ang guidance niya kung paano lumabas ang show. Iba rin ang interpretation ko at interpretation ng batang Johnny [Kristoffer Martin] kasi it says a lot. Kung i-compare mo rin sa dati which we cannot avoid, kanya-kanyang interpretasyon 'yan and I will pick it up from there."

Nakusap ng PEP (Philippine Entertainment Portal) at ilan pang piling press na naiwan kagabi, June 23, sa SM Megamall Cinema 1, kung saan ginawa ang special screening ng pilot episode ng Endless Love. Hindi na kasi dumiretso ang aktor sa isang restaurant sa Megamall din kung saan nagkaroon ng one-on-one interview ang ibang mga cast members sa press.

MUCH-AWAITED TELESERYE. Marami ang na-impress sa pagganap ni Dingdong bilang Cholo sa Stairway to Heaven. Sa palagay kaya niya ay garantisadong mas marami ang magkakagusto sa pagganap niya ngayon bilang Johnny sa Endless Love, lalo na't kasama na naman niya si Marian?

"Hindi siya guarantee," sabi ng 29-year-old actor. "Pero isa lang guarantee rito, yung dedication namin sa trabaho namin. Especially kami as individuals. It's because ayoko rin namang mag-bank sa ganoon na baka sabihin, dapat mas maganda ito dahil kami talaga off-cam. Hindi, e.

"Unang-una, mas naniniwala kami sa material. At sa amin as individuals, kapag sinabi mong ito ang kailangang gawin for the role, talagang sineseryoso namin siya. And I think, that's one thing na nagustuhan ko rin sa kanya [Marian] is because talagang sineseryoso niya ang mga bagay na ganito, and this is just one example."

Ang Endless Love na yata ang isa sa much-anticipated and much-awaited na teleserye ng Kapuso network this year. In fact, last year pa lamang ay nababalita at nasusulat na ang muling pagsasama nina Dingdong at Marian sa TV, after Ang Babaeng Hinugot sa Aking Tadyang, sa isa sa mga highest-rating Korean soaps na ipinalabas sa Pilipinas.

May pressure ba silang napi-feel na heto't ipalalabas na ang Endless Love?

"Meron, e," pag-amin ni Dingdong. "Pero sa ngayon, gaya ng sabi ko, nauna ang mga bata. Malaking bagay na doon kami kumuha ng mga tips, e. Kasi sa totoo lang, kaunti pa lang din ang mga nakukunan sa amin na may dialogues. Kagabi, medyo meron, pero hindi nga lang naipalabas. Kasi lalabas din kami towards the end of week one pa."

Ano naman ang reaksiyon niya na marami na ang nag-aabang sa Endless Love, na ipalalabas na simula sa Lunes, June 28?

"Hindi...  Kasi, parang palagi namang sinasabi yun, e. In every project, sinasabing 'this is the best so far, this is the most expensive.' And then, when something new comes again, they will say 'this is the most expensive, better from the previous one.' So, siyempre, it's part of evolution lang din that we produce better show as we go along. Pero siyempre, medyo lang ngayon dahil matagal siya nasabi, last year pa. Siguro, isa lang sa mga dahilan yun and the fact na nagiging exciting lang din because of the network war," saad ni Dingdong.

Ano ang masasabi niya pagkatapos niyang mapanood ang pilot episode ng Endless Love?

"It sets the mood, the tone, and the plot very well sa umpisa pa lang," ani Dingdong. "Kumbaga, noong napanood mo, alam na alam mo na talaga kung ano ang mangyayari sa istorya. Malinaw na kung ano ang magiging direksiyon. Alam mo ang magiging intensiyon ng mga artista. So, madali siyang sundan at swak na swak sa panlasa ng Filipino na mahilig sa soap opera."

Ayon pa kay Dingdong, sinabi naman sa kanila na magiging faithful  ang Pinoy version sa Korean version.