Tungkol sa "instant favorites" ang unang mga itinanong ng press kay Piolo Pascual sa launching niya bilang first male endorser ng Quickchow Instant Noodles kahapon, August 5. Ginanap ang launch cum presscon sa 14th floor ng ELJ Bldg. sa ABS-CBN compound.
Hanggang sa madako ang usapan sa pagiging "active" ng lifestyle niya at kung ganoon din ba ang sex life niya. Pero hindi na ito nasagot ng aktor dahil mismong ang moderator ng presscon ang nagsabing hindi nag-e-entertain ng ganung klaseng tanong si Piolo.
ACTIVE LOVELIFE. Nang magkaroon ng pagkakataong makausap ng PEP (Philippine Entertainment Portal) at iba pang entertainment press si Piolo after the formal launch, ang itinanong na lang sa kanya ay kung active ba ang kanyang lovelife.
"Lovelife is active," nakangiting sagot ng matinee idol.
Pero nang tanungin kung kanino ay nag-beg-off na si Piolo. Aniya, "Kailangan pa ba yun? Yun na lang po yun."
Pero tinanong pa rin siya kung si KC Concepcion ba ang nagpapa-active ng lovelife niya.
"Yes," nakangiti namang pag-amin ni Piolo.
Sila na ba talaga?
"A, huwag namang gano'n," pakiusap ng aktor. "Let's not get into details. I can't...it's hard to talk when you're both in showbiz. And it's really something na we choose not to talk about because, I think, it's something that we owe to ourselves. We opted not to do any movies or TV after Lovers [in Paris, their defunct ABS-CBN primetime series] because we'd rather preserve and protect our relationship. Yun lang po siguro."
ALL IS WELL. Recently ay nagkaroon ng kontrobersiya sa pagitan ni Piolo at ng mag-inang Sharon Cuneta at KC Concepcion. Nagsimula ito sa diumano'y offensive Twitter post ng anak ni Piolo tungkol kay KC. Humingi ang Megastar ng kahit man lamang statement mula kay Piolo upang linisin ang pangalan ni KC at maging ng kanyang anak. Ito naman ang ginawa ni Piolo, na humingi ng paumanhin kay KC at sa pamilya nito, kasabay ng paglilinaw na walang Twitter account ang kanyang anak. (CLICK HERE to read related story.)
Kumusta na sila ni Sharon pagkatapos niyang mag-issue ng official statement?
"Wala naman kasing... Siguro as a mom, she really just wanted me to say my piece about the issue. At naitawid naman, okey naman. And I visited her last Sunday in her dressing room. Okey naman kami."
Dagdag ng aktor, "Napakaliit ng industriya natin, and she's not one person na puwede mong balewalain. She's the mom of KC. She's the Megastar."
Naapektuhan ba kahit paano ang relationship nila ni KC dahil sa isyung 'yon o naging stronger pa ito?
"I guess, it made it stronger," sagot ni Piolo. "It gave us a better insight and mas naintindihan namin ang isa't isa. But, I guess, bottom line, even before it happened, we knew where we were coming from already."
Bilang patunay na walang problema sa kanila, kinumpirma nitong manonood siya ng concert ng Megastar, ang Megadrama, sa Araneta Coliseum sa Linggo, August 8.
SOCIAL NETWORKING SITES. May lesson ba siyang natutunan hinggil sa paggamit ng social networking sites kahit wala siyang personal account sa Twitter o Facebook?
"It's been a sensitive issue," sabi ni Piolo. "And it's something na, as much as possible, I don't wanna talk about. That's why I released that statement. Pero sabi ko nga, I'm doing this presscon, kasi nga, wala naman tayong kawala sa mga ganyang tanong.
"Ang sa akin, of course, I have to protect and defend my son. First of all, hindi naman siya from show business and I have to protect his privacy. He's not based here. It just so happened na uuwi yung bata. It's hard, it's hard for him."
Nasa bansa raw ngayon ang 13-year-old son ni Piolo para magbakasyon. Pero hindi pa raw nagkikita sina Iñigo at KC ngayong nasa bansa na ang anak.
Ayon pa kay Piolo, "Ang hirap kasi, ang daming pumatol. Accusing people of certain things. At least, we set the record straight. It was really not my son. Kung sinuman ang mga naglabas noon, sana makonsensiya sila. Relationship ang sinisira nila, e. So, in time, just like with Tita Sharon... Tita Sharon said, 'Malalaman natin, ipapa-investigate natin,' and I really wanna find out kung sinuman ang taong yun."
Naniniwala si Piolo na malalaman niya kung sinuman ang poser o hacker ng kanyang anak sa Facebook at Twitter
"I'm positive, I'm positive," sabi niya. "Kasi, I'm thinking maybe it's from the States. Kasi ang pag-hack naman ng Facebook at Twitter, worldwide naman yun, nasa Internet 'yan. So, marami lang talagang... Kasi noong nakita ko yun, pino-forward sa akin, nababasa ko lahat. Hindi naman gagawin ng isang bata yun."
Ano ang naging reaction ng anak niya nang malaman nitong siya ang napagbibintangan nag-post ng status sa Twitter against KC?
"He felt bad. He felt bad because I wasn't even defending him. Because gusto ko rin malaman. Like I've said in my statement, I had to get the right information kung sino ba ang nagpo-post ng mga yun. Hindi ko pa rin nakukuha, but I was forced to give a statement because it was getting out of hand."
May initiative ba siyang gagawin para magkita sina Iñigo at KC?
"That's something private," sabi niya. "Hindi ko na siguro puwedeng sabihin pa. Sa amin na lang yun kung magkita ang dalawa, if it will happen."
HIS SON KNOWS. Totoo ba na kapag may nali-link sa kanyang babae ay nagagalit ang anak niya dahil diumano'y may pagka-seloso ito?
"Natural lang sigurong reaction yun. Even when I was his age, ganoon din ako, e. So, puberty stage yun, e. But the most important thing is, you spend time with him and give the attention that he needs and he deserves. So, yun," saad ni Piolo.
Aware ba ang anak niya sa kung ano ang set-up nila ng mommy nito?
"Oh, yes, ever since...ever since."
Ayon kay Piolo, wala pa raw ibang pamilya ang mommy ni Iñigo. Hindi kaya naiisip ng bata na sila pa rin ng mommy nito?
"No, we talked about it. Maayos ang pag-uusap namin," sagot ni Piolo.