"Actually, as much as possible, I don't wanna comment about it. Anything na hindi masyadong masaya, quiet lang."

Ito ang naging sagot ni Claudine Barretto nang usisain ng PEP (Philippine Entertainment Portal) tungkol sa nababalitang away nila ng young actress na si Angelica Panganiban. Nakausap ng PEP si Claudine sa presscon ng In Your Eyes noong Martes, Agosto 17, sa Annabel's restaurant.

Hindi malinaw kung ano o kung tungkol ba saan ang pinagmulan ng kanilang away. May nagsasabing nagsimula ito nang magkaroon ng iringan sa pagitan ni Angelica at ng kapatid ni Claudine na si Gretchen Barretto. Pero kailan lang ay nagkaayos na ang dalawang Kapamilya stars. (CLICK HERE to read related story.)

Maging sa Twitter ay nagsasagutan din daw sina Claudine at Angelica, na nagkasama sa teleserye noon ng ABS-CBN na Iisa Pa Lamang (2008), ang huling proyekto ni Claudine bago siya lumipat sa GMA-7.

Ayon pa sa lumabas na reports, idedemanda raw ni Claudine si Angelica dahil sa mga sinasabi diumano nito laban sa kanya.

Pero hangga't maaari ay ayaw magbigay ng pahayag ni Claudine tungkol dito.

"I'm not gonna confirm or deny anything, but it's not needed sa pelikula namin bilang respeto kay Anne [Curtis] na rin. Pag hindi kailangan, huwag na lang," iwas ng aktres. (Si Anne ang co-star ni Claudine sa In Your Eyes).

Nang tanungin ulit kung totoo ngang may away sila ni Angelica ay ngumiti lang si Claudine. Ngiti lang din ang sagot niya sa iba pang mga katanungan tungkol sa isyu sa kanila ng Kapamilya actress.

Pero sa huli ay nagbigay rin si Claudine ng matipid na comment  tungkol sa nararamdaman niya sa pangyayari.

"Hurt lang. Yun na yun," sabi niya.

Hanggang ngayon naman ay wala pa ring naririnig na pahayag mula kay Angelica tungkol sa diumano'y isyu nila ni Claudine.

DOING SEXY SCENES. Kapansin-pansin naman ang pagtindi ng love scenes ni Claudine sa pelikula, gaya na lamang ng mga eksena nila ni Richard Gutierrez sa In Your Eyes. Kahit madalang gumawa ng pelikula ngayon ng aktres, pag nabibigyan, isinasalang naman siya sa mga maiinit na love scenes.

Hanggang saan lang ba ang kaya niyang gawin pagdating sa mga ganitong mga eksena?

"As long as talaga na kailangang-kailangan ng character ko at role sa pelikula, gagawin ko," sagot ni Claudine. "But like to go sexy-sexy talaga, yung ganyan, hindi ko magagawa, e. Yun lang. Yung hanggang kaya lang ng age ko, kung ano ang hinihingi ng character ko. Pag nakita ko siyang hindi na siya tama, hindi naman ako papayag."

Sinabi ng 31-year-old actress na hindi nila pinag-uusapan ng asawa niyang si Raymart Santiago ang anumang love scenes, kissing scenes, o intimate scenes niya sa kahit na anong pelikulang ginawa niya o gagawin pa lang.