Limang taon na ang reality show ni Carmina Villarroel sa QTV11 na Day-Off. Humahataw rin sa ere ang morning show nila ng partner niyang si Zoren Legaspi sa GMA-7, ang Love ni Mister, Love ni Misis. Bukod dito, kasama rin siya sa reality sitcom ni Michael V na Pepito Manaloto.
Ito ang dahilan kaya hindi maiwasang tanggihan ng TV host-actress ang offers sa kanya na gumawa ng mga teleserye.
Pero nami-miss ba niya ang paglabas sa mga soap?
"Nami-miss siyempre," sagot ni Carmina sa PEP (Philippine Entertainment Portal). "Pero pag mag-soap pa ako, wala na akong buhay. Kasi ang soap, di ba, three times a week? E, yung Love ni Mister, Love ni Misis, twice a week kaming nagte-taping, tapos meron pa akong Day-Off, tapos may Pepito Manaloto pa ako. So, four times a week. Hindi ko na alam kung saan ilalagay ang soap kung tatanggap pa ako."
MISSES DOING MOVIES. Ayon kay Carmina, ang paggawa ng pelikula ang isa sa gustong balikan niya.
"Movies, yun ang sobra kong nami-miss!" sambit niya. "Given a chance, talagang... Normally, mabilisan nang gumawa ng movies ngayon kapag kinomit mo ang sarili mo na three months, four months, whatever. Siguro kaya kong mag-sacrifice na ibigay ko yung Monday sa kanila and yung Saturday.
"Yun ang gusto ko. Wala lang, nami-miss ko lang. Parang nami-miss ko ang sarili kong makita sa screen. Basta, gusto kong gumawa ng movie, period.
"Tapos, may mga plano-plano pa lang. Sana matuloy. Merong offers kaya sana matuloy. Kasi palaging gano'n, hanggang doon lang.
"Siyempre, if ever na gagawa ako ng movie, gusto ko namang may something na ikatutuwa naman no'ng mga tao. At saka gusto ko, hindi naman yung parang sinabi lang na 'Oy, may pelikula ako!' 'Pero nasaan ka? Hindi kita nakita.'
"Hindi naman gano'n kadali tapos naging busy rin naman TV, sa commercial. So, hindi ko masyadong naintindi yung sa movies ko. Ngayon, ang balita ko, may offer. Sana, sana matuloy."
Wala pang maibigay na detalye si Carmina sa sinasabing movie project dahil nabanggit lang daw ito sa kanya ni Zoren.
"In passing lang na nakuwento sa akin ni Zoren. Kasi, di ba, si Zoren magdidirek ng isang episode ng Shake, Rattle & Roll? Yun yata ang pang-filmfest. Tapos, may na-mention nga sa kanya sina Mother [Lily Monteverde] sa Regal. Hindi ko sure kung pang-filmfest. Alam mo naman si Mother, di ba? Hanggang hindi nagsu-shoot, hindi pa sigurado," saad ni Carmina.
ELEVEN YEARS. Mabanggit lang ang pagiging okey nilang dalawa ni Zoren sa morning show nila ay napapangiti na nang husto si Carmina.
"Kasi nga, nakakatawa siya, di ba?" paliwanag niya. "Parang karakter na nga ako, e. Kasi nga, importante yung nag-start kaming magkaibigan. So, magkaibigan kami. Kaya no'ng naging mag-dyowa kami, hindi naman nawala yung friendship na yun, e. Hindi na ako yung, 'Ay, hello!' Hindi naman ako pa-girl at hindi rin naman siya pa-cute.
"At kahit artista kami," patuloy ni Carmina, "hindi namin napi-feel na artista kami. Pag wala kaming trabaho, normal lang kaming tao, ordinaryo lang."
Hindi rin itinatanggi ni Carmina na may mga tampuhan at diskusyon silang dalawa ni Zoren.
"Ay, dysuko!" bulalas niya. "Kung ano yung napapanood mo sa TV, ano kami, we argue a lot. Bickering kaming dalawa, pero hindi kami nag-aaway. Yun ang akala ng mga tao... Pag hindi mo kami kilala at pag narinig mo kaming nagkakaroon ng argument, akala mo nag-aaway kami.
"Pero wala sa amin yun. Tapos nun, tapos na. Walang nangyaring hindi kami nagpansinan? Wala. Wala talaga. Kasi nga, sa sobrang kakilala namin ang isa't isa, let say mainit ang ulo ko, nabuwisit ako sa kanya... May mga times na gano'n na nabuwisit ako sa kanya, ganundin siya sa akin. Tatahimik lang siya o kaya magti-tennis muna siya. Pagbalik niya, okey na ulit.
"Kasi feeling namin, unang-una, it's just a waste of time to fight. Kung mababaw naman, huwag n'yo munang pag-aksayahan ng panahon. Ngayon, kung naiirita ako, shut up ka na lang muna."
May 11 years nang nagsasama sina Carmina at Zoren, na hindi pa halos matandaan ng actress-TV host.
"Oo 'ata... Basta, lahat-lahat na yun ng buong relationship... Oo nga, ano? Eleven years na pala kami! Kasi, wala kaming anniversary.
"Kasi, hindi naman niya ako niligawan. Hindi siya yung type of guy na typical na dadaanin ka sa ligaw, best foot forward, ganun-ganun. Kasi nga, hindi siya naniniwala doon na tama naman. Kasi kita mo, bigla na lang nangyari na, ay, naging kami na at wala kaming anniversary.
"Kung yun dati, iniisip ko na bakit gano'n? Kami lang yata ang walang anniversary, hindi man lamang kami nakapag-celebrate, ganun-gano'n. So, feeling ko pala, kapag nagsi-celebrate ka, parang nagbibilang ka. Ganun.
"So, eto na, bigla na lang tinanong kami, 'Gaano ka kayo katagal?' 'Sandali, a...' Tapos magbibilang na kami. Kita mo, hindi ko ini-expect, 11 years na pala kami!" tila hindi rin makapaniwalang sabi ni Carmina.
TO WED OR NOT TO WED. Hindi rin itinatanggi ni Carmina na hindi pa legal ang pagsasama nila ni Zoren. Saka lang daw nila naalala ang tungkol dito kapag natatanong sila ng press kung kasal na sila.
"Kasi, parang sa ibang tao, big deal kasi. Parang issue sa kanila kung kasal kami o hindi," sabi niya. "Ang hirap kasing i-explain. Kasi sa aming dalawa ni Zoren, kasal kami. Ngayon, hindi nila naiintindihan yun, para kailangang pagdaanan yung normal na ganyan-ganyan.
"So, ngayon, pinag-uusapan na namin yun. Kasi nga, akala namin, bilang... Akala na nga namin kasal na kami. Hindi na nga namin iniisip, e. Kaya kapag natatatanong kami, 'Oo nga pala, 'no?' Parang sa kanila importante yun.
"We feel complete na nga, e. Hindi din naman namin sinasabi na, 'Oy, gayahin ninyo kami, ha?' Na ganito yung set-up namin. Siyempre, hindi naman kami nagpapaka-self-righteous.
"Siyempre, irespeto naman natin yung Catholic church. Pero inaayos namin, hopefully within this year. Pero ano lang, simple lang. Civil wedding na lang. Ayoko na ng church [wedding].
"Kasi, parang gagawin din namin ito para din naman sa... Kumbaga, para malinis naman na rin. Kumbaga, hindi namin siya gagawin para sa amin. Parang matapos na lang talaga. Kasi, okey naman kami with or without. We feel na parang mag-asawa na kami. Sinasabi naman ng iba na it's just a piece of paper.
"Kasi nga, kaya ayaw ko rin siyang i-broadcast because nga baka may mag-react sa church natin na baka ma-misinterpret nila ako na I don't believe in marriage. Of course, I still believe, I do believe in marriage.
"Pero yun nga lang, in our case, parang I don't feel incomplete nga, e. Ganun din si Zoren. Wala naman kaming insecurities na parang ang marriage ang maghu-hold ng relationship na namin. Yun na yung assurance na hindi kami maghihiwalay.
"Hindi ako naniniwala doon kasi marami na talaga akong nakita na after years of marriage, kung kailan tumanda, doon nagkahiwalay. So, it's not an assurance na pag kinasal kayo, hindi na kayo maghihiwalay. Kayo na forever. E, ang dami ngang naghihiwalay, e.
"So, kami, since wala namang problema, wala namang issue, ba't pa natin kailangang i-solve yung hindi naman nating kailagang i-solve? Ngayon, we're just going to do this para maging malinis na lang sa lahat," mahaba-habang paliwanag ni Carmina sa gusto niyang ipunto.
Wala pa raw silang napipiling date ni Zoren para sa kanilang civil wedding.
"Ay, hindi ko alam. Biglaan na lang siguro. Unang-una, kaya siya magiging parang biglaan na lang, or hindi na namin kailangan ng malaking preparasyon, kasi it's not a big thing. Hindi siya malaking selebrasyon.
"Ayoko kasi, e. Unang-una, parang I passed the stage na rin you wanna walk down the aisle. Parang lumipas na ako sa gano'ng stage," sabi niya.
CIVIL WEDDING. Diretsahang sinasabi ni Carmina na hindi na niya iniisip ang makasal pa sa simbahan dahil kuntento na siya sa magaganap na civil wedding nila ni Zoren.
"Hindi na. Okey na ako na kasal ako sa civil," sabi niya.
"Simple lang akong tao. Family nga lang yung mga naiisip kong magwi-witness and few friends lang sa reception. Kahit ganito na lang outfit ko [jeans at t-shirt], pasok na ako sa banga! Siguro it's the ceremony which is important at ang family namin. Pamilya ko, pamilya niya [Zoren].
"Pero siyempre, masarap pa rin namang mangarap na, 'Uy, sana ganito, gano'n.' Pero siguro nga, parang solve na ako doon sa... I passed the stage na sa mga gano'ng dreams. Parang dati na ganito yung sa souvenir, ganito yung motif, ganito yung gown. Pero ngayon, iniisip ko na mag-ipon na lang tayo para sa future ng mga bata."
Wala na raw inaasahang proposal pa si Carmina kay Zoren dahil nakapag-propose na raw ito sa presscon ng kanilang show. Yun nga lang, hindi niya alam kung seseryosohin niya ang ginawa ng live-in partner o hindi.
"Parang feeling nga namin, nilalaro lang namin. Sabi ko nga sa iyo, kakaiba kaming mga nilalang. Bahala na lang si Zoren, ke may second o wala nang proposal, okey lang sa akin. Kasi ano ako, pa-girl pa ako at sasabihin kong no!" tawa niya.
"Okey na sa kahit na ano. Pero siyempre, mas okey rin kung may second proposal, huwag na lang sa TV, sa harap ng maraming tao, kasi nahihiya talaga ako. As much as... Di ba, nakikita mo naman sa iba na it's so romantic, sweet naman?
"Ako kasi, palagi na lang akong nasa harap ng kamera. Gusto ko naman yung moment na special na kaming dalawa ang nandoon at may surprise naman. Pero hindi ko naman sinasabing yun ang dapat mangyari. Pero given a choice, if ever, wala na lang or huwag naman sa national television. Kahit sabihin mong sincere siya, ayaw ko lang, nahihiya lang talaga ako.
"Weird nga, di ba? Kasi artista kami, kami yung center of attention. Sa mga bagay-bagay na gano'n, hindi naman trabaho yun. So, huwag mo nang ibigay sa akin yung attention."
IN-DEMAND PRODUCT ENDORSERS. Natutuwa naman si Carmina dahil hindi naging issue sa endorsements nila ang hindi nila pagiging legal na mag-asawa. Naniniwala siyang ang nakita raw kasi siguro ng advertisers ay ang magandang samahan nila ni Zoren at ng kanilang mga anak.
"For them siguro, it's really our family. How we are as parents. Nakita rin nilang lumaki na rin yung kambal. Nakita rin naman nilang mababait ang mga anak ko. Wala namang tsismis sa aming dalawa ni Zoren na magkaaway kami, or may third party involved or nagkahiwalay.
"Pag nakita mo yung pamilya namin, na hindi naman namin sinasadya, or hindi naman kami nagru-role playing na, 'Oy, kunwari perfect tayo, ha? Ideal tayo ha?' Gano'n lang talaga kami.
"Yun siguro ang nakita ng mga kliyente plus yung kambal naman cutie pie-meat loaf. Off camera, they see us kung paano kami as a family. Pag nasa harap ng camera, siyempre acting. Pero off-cam, nakikita rin nila kung paano kami as parents at kung paano rin yung mga anak namin sa aming mga magulang nila."