Apat ang regular shows ng young actor na si JR de Guzman sa bakuran ng TV5. Bukod sa teen drama na BFGF, regular ding napapanood si JR sa Sunday musical-variety show na P.O.5. Kasama rin siya sa 5-Star Drama Specials Presents Lani Misalucha at sa primetime soap na My Driver, Sweet Lover starring JC de Vera, Dina Bonnevie, and Richard Gomez.
Meron ding show si JR sa GMA-7, ang teen-oriented lifestyle show na Ka-Blog.
Dahil sa dami ng projects niya, may kumakalat tuloy na balita na may nag-aalaga diumano sa kanyang may mataas na posisyon sa TV5. Pinagtawanan lamang ito ng binatang aktor.
"Nakakatawa naman yung balita, wala namang katotohanan yun," sabi niya sa PEP (Philippine Entertainment Portal). "Sino naman daw na may mataas na posisyon sa TV5 yung sinasabi nila? Dapat pinangalanan nila nang magkaalaman kung totoo o hindi, dahil wala naman talagang katotohanan yun.
"Siguro lang, nagkataon lang na bagay sa akin yung mga proyektong ibinibigay nila sa akin kaya sa akin napupunta. Hindi lang naman ako ang ganun kadaming shows sa TV5, marami ring artists ang kaliwa't kanan ang show sa Singko kaya bakit ako lang ang natsitsismis na ganun?
"Ako naman kasi, pag binigyan ako ng trabaho, nagtatrabaho ako nang maayos para masundan pa yung trabaho ko. Yun naman kasi ang dapat na gawin, di ba, para bigyan ka nila ulit ngtrabaho?" mahaba niyang paliwanag.
Nakausap ng PEP si JR sa contract-signing, presscon, at formal launching niya bilang pinakabagong celebrity endorser ng Olive C anti-pimple soap sa Kaboom restaurant sa Timog, Quezon City, kahapon, September 9.
Bukod sa kanyang TV shows ay kaliwa't kanan din ang TV commercials at endorsements ni JR gaya ng Coke, Argentina beef loaf, Judge bubble gum, Smart, Poteen-C, Buddy Crackers, at Jollibee. Paano niya nagagawa ang lahat ng ito?
"Sipag lang po talaga," nakangiti niyang sagot. "Masipag kasi akong mag-VTR at nagkakataon namang bagay sa akin yung hinahanap nilang character kaya naman sa akin napupunta."
DIREK JOEY REYES. May report ding lumabas na tinanggal daw si JR ni Direk Jose Javier Reyes sa 5-Star Drama Special Presents Lani Misalucha dahil hindi raw siya sumipot ng isang taping. Pinabulaanan naman ito ng young actor.
"Naku, hindi ko alam yun. Ang alam ko, tapos na yung taping ko dun," sabi ni JR. "'Tsaka hindi totoo na hindi ako sumipot sa isang taping ng 5 -Star. Ang totoo kaya hindi ako nakapag-taping ng isang araw, dahil nagkaroon ng miscommunication between my manager at sa staff ng 5-Star.
"Bale, hindi na-text sa manager ko na may taping ako that day kaya hindi namin alam na may taping ako. Bale ang call time ko daw ay 11 a.m. pero 2 p.m. na nang abisuhan kami na may taping ako.
"Nagkataon naman na may sakit ako noon kasi kauuwi ko lang galing ng taping ng BFGF. Naulanan ako kaya naman nagkasakit ako. Nagpaalam ang manager ko sa kanila na hindi ko kayang mag-taping at inaprubahan naman nila at pinagpahinga na lang ako.
"Kaya hindi totoo na tinanggal ako doon, at mas lalong hindi totoo na hindi ko sinipot yung taping ng 5-Star," diin niya. "Ako naman, pag hindi ako puwede, sinasabi namin nang mas maaga.
"Tsaka hindi totoo na galit sa akin si Direk Jose Javier Reyes. Sobrang bait sa akin ni Direk. Si Direk pa nga ang nagsabi na magpahinga ako para gumaling kaagad."
