Ibinabalik ng GMA-7 ang tambalan nina Raymart Santiago at Gelli de Belen sa bagong primetime series na Bantatay.

Lingid sa kaalaman ng marami, naging magkasintahan noon sa totong buhay ang dalawang Kapuso stars. Nagtambal din sila sa ilang pelikula  ng Viva Films, kung saan sila naging contract stars.

Mga two years din tumagal ang relasyon ng dalawa.

Fifteen years later, may kanya-kanya nang pamilya sina Raymart at Gelli. 

Si Raymart ay kasal sa aktres na si Claudine Barretto at mayroon silang isang adopted daughter (Sabina) at isang anak na lalaki (Santino). Si Gelli naman ay napangasawa ang singer-actor na si Ariel Rivera at may dalawa silang anak na lalaki (Joaquin at Julio).

REUNITED. Gumaganap bilang mag-asawa sina Raymart at Gelli sa Bantatay, na magsisimula nang ipalabas sa Lunes, September 20.

Sa presscon ng Bantatay noong Martes, September 14, marami ang nagtanong kay Raymart kung kumusta na sila ni Gelli ngayong magkatrabaho silang muli.

"Okay, okay naman," nakangiting sagot ng 37-year-old actor.

"Nakakapanibago dahil gaya nga ng sinabi ko, mga labinlimang taon na rin kaming hindi nagkasama. Ganun pa rin. Talagang mabait naman si Gelli. 

"Hindi pa kami gaanong nakakapagkuwentuhan kasi tuloy-tuloy ang mga eksena namin."

Pareho na silang may asawa at mga anak. Natatawa na lang ba sila kapag naaalala nila yung nakaraan nila?

Sabi ni Raymart, "Noong nalaman ko dati si Ariel Rivera ang mapapangasawa niya, e, talagang boto naman ako kay Ariel.

"Kasi, may mga iba siyang nanligaw na hindi ko gusto. Si Ariel ang talagang sinabi ko, na sa tingin ko, aalagaan siya."

Tinanong ng PEP (Philippine Entertainment Portal) si Raymart kung ano naman ang naging reaction ng asawa niyang si Claudine nang malaman nito na si Gelli ang gaganap na asawa niya sa Bantatay?

"Wala naman, wala naman sa kanya yun. Past is past at may kanya-kanya na kaming pamilya. Sa amin, trabaho lang," sagot niya.