Namumula at namamaga pa ang kanang mata ng young actor na si Rocco Nacino nang makausap siya ng PEP (Philippine Entertainment Portal) sa taping ng Koreana sa Sta. Maria, Pampanga noong Lunes, November 8.

Sa taping kasi ng naturang GMA-7 afternoon soap nakuha ni Rocco ang pinsala sa kanyang mata. May eksenang nagbo-boxing sila ng co-star niyang si Suzuki Sadatsugu at aksidenteng napuruhan ang kanang mata ng StarStruck V Second Prince.

Kuwento ni Rocco tungkol sa mga pangyayari noong Nobyembre 5, "Last Friday, when we taped our boxing scene—'yon yung boxing scene na ginawa namin—and I just recovered from sore eyes kasi. So, medyo weak pa yung mata ko. So, nasabak agad sa physical stress, ganun, tapos boxing pa.

"E, siyempre, for camera trick, sabi ni Direk [Gil Tejada Jr.], 'Ayan, sige, medyo totohanin n'yo na para ano... Tiisin n'yo na lang.'"

Nasangga naman daw niya ang mga suntok ni Suzuki. "Pero, siyempre, aksidente, may nakakalusot pa rin na sapak. So, na-trauma ang mata ko, nabugbog, bumigay ang ugat, pumutok!

"Hindi siya talaga nagdugo, pero sa loob namaga [ang mga ugat]. So it started here [gilid ng eyeball] and eventually pumunta siya sa gitna.

"Slowly, nawawala na siya," sabi pa ng 23-year-old actor.

Pinatingnan daw agad ni Rocco sa doktor ang mata niya.

"Dun sa pinsan kong doktor, sabi niya, 'Eventually mawawala siya.' Pero sobrang tagal daw 'yon. Naka-one week na ako. Tingin ko aabot pa ng two weeks ito."

Ipinakita nga ni Rocco sa PEP ang mata niya. Pulang-pula pa rin ito at medyo namamaga pa rin bunga nga ng naturang boxing scene na kinunan sa Amoranto Stadium.

Hindi naman daw nagalit si Rocco kay Suzuki.

"A, hindi po, hindi po. Nag-sorry naman siya agad, e."

Ano ang sabi ni Suzuki sa kanya pagkatapos ng aksidente?

"Lumapit siya sa akin, sabi niya, 'Uy, okay ka lang? Nasaktan ka ba?' Nag-sorry naman agad siya, sabi ko walang kaso yun, aksidente. Accidents happen, so it's all right."

After the scene, hindi raw agad napansin ni Rocco na may matindi siyang tama sa mata.