Anuman ang kahihinatnan ng pelikulang Rosario sa darating na 36th Metro Manila Film Festival, sinabi ng direktor nito na si Albert Martinez na masaya at "more than contented" siya sa kinalabasan ng proyekto.

"It's all worth it," pahayag ni Albert sa PEP (Philippine Entertainment Portal) nang makausap namin siya ilang minuto bago magsimula ang special screening ng pelikula last Wednesday, December 15, sa Podium mall sa Ortigas, Pasig City.

Hindi nagdaos ng magarbong premiere night ang Rosario na kadalasang ginagawa ng mga pelikulang kalahok sa taunang MMFF.

Maganda naman ang diskarteng ito dahil naging tahimik at intimate ang event na dinaluhan ng ilang miyembro ng press, bloggers, at staff and executives ng Solar Entertainment—ang kumpanyang hahawak sa distribution ng Rosario sa mga sinehan sa pagbubukas nito on December 25.

Umani ng papuri si Albert mula sa invited guests pagkatapos mapanood nang buo ang pelikula na pinagbibidahan ng aktres na si Jennylyn Mercado.

Maganda ang pelikula at pulido ang pagkakahubog ni Albert sa naging makulay na buhay ng lola ng negosyanteng si Manuel "Manny" Pangilinan.

Lumitaw nang husto ang pagiging mabusisi ni Albert dahil wala itong pinalagpas na detalye pagdating sa setting, karakter, at kalidad ng pamumuhay nating mga Pilipino noong panahon na nasa ilalim tayo ng mga Amerikano matapos ang mahabang pamamalagi dito ng mga Kastila.

Naging malinaw rin sa amin kung bakit matunog ang pangalan ni Jennylyn na magwagi bilang Best Actress sa gaganaping MMFF Awards Night on December 26.

Mahusay rin ang naging pagganap nila Dennis Trillo, Yul Servo, Sid Lucero, Ricky Davao, Isabel Oli, at ng Comedy King na si Dolphy.

"Actually, all of my actors are very good. Hindi ko ma-imagine na ibang artista ang gaganap ng roles nila kasi perfect sila. Half of my work is done dahil magagaling sila," pagmamalaki ni Albert noong grand press conference na ginanap noong December 13 sa Area 05 sa Tomas Morato, Quezon City.

LONG PREPARATIONS. Limang taon ang iginugol na pag-aaral at paghahanda para maisakatuparan ang Rosario.

Nagkaroon din si Albert ng "series of so many sessions" kasama si Manny Pangilinan para masiguro na tumpak ang script ng pelikula dahil true story ito.

Ano ba ang naging impression niya sa TV5 head boss sa maraming oras na pakikipag-usap niya dito?

"I'm a fan of Mr. Pangilinan because he's a brilliant man, and not only is he a businessman but he's a filmmaker himself. He knows what he wants for the film and he knows kung ano 'yong flow ng story. So more than anything, he's a filmmaker," sagot ni Albert.

Mahilig si Albert manood ng period films kaya natutuwa siya at nabigyan ng pagkakataon na makagawa ng isang proyekto na kakaiba ang tema kumpara sa mga pangkaraniwang local films na ginagawa sa kasalukuyan.