Kasama sa kontratang pinirmahan ni Mark Bautista sa paglipat niya noon mula ABS-CBN papuntang GMA-7 ang pagkakaroon ng teleserye. Kaya isang magandang sensyales sa pagsalubong ng bagong taon ang pagkakasama niya sa Dwarfina.

Ginagampanan ni Mark dito ang papel ni Estong, ang matalik na kaibigan ni Lyndon, na ginagampanan naman ni Dennis Trillo.

"Sobrang saya ko. Iba ang atmosphere at medyo bago lahat sa akin," sambit ni Mark nang makausap siya ng PEP (Philippine Entertainment Portal) sa press conference ng Dwarfina kagabi, January 4.

Nakaka-one taping day pa lang si Mark kaya hindi pa raw niya nakakasalamuha ang ibang co-stars niya rito.

MARK AS A KAPUSO. Malapit na ring mag-one year sa GMA-7 si Mark simula nang i-launch ang musical-variety show na Party Pilipinas noong March 28, 2010.

Tinanong ng PEP ang singer-actor kung na-meet ba ang lahat ng expectations niya nang pumirma siya ng kontrata sa Kapuso network.

"Well, itong soap lang naman ang na-delay. At ako naman, ayoko rin naman na tanungin pa nang tanungin ang manager ko kung ano ba ang nangyari. 

"But ngayon, yung GMA naman, hindi naman ako pinabayaan, at talaga namang naghanap sila ng material for me," saad niya.

Three years daw ang pinirmahan niyang kontrata sa GMA at masaya naman daw siya so far.

"Walang regrets. Sobrang happy ako," sambit ni Mark.

"Kasi yung mga... like exposures ko naman sa Party Pilipinas... Sa ASAP, hindi sa wala akong exposures, pero napangalagaan pa rin akong talaga sa Party Pilipinas. Nadagdagan bale yung exposure."

Good thing for Mark, open at nakakasama pa rin naman daw niya ang mga dati niyang kasamahan sa Kapamilya network.

MARK'S LOVE LIFE. Nangiti naman si Mark nang kamustahin namin ang love life niya, sabay sabing, "Masaya."

Ibig bang sabihin nito ay meron siyang love life ngayon?

"Well, ako, masaya na ako noong 2010 kasi punung-puno ako ng pagmamahal at masaya ako," nakangiti niyang sagot.