Sumang-ayon si Ogie Alcasid sa pahayag ng kapwa singer niyang si Kuh Ledesma na higpitan ang regulasyon para sa mga dayuhang mang-aawit na nagko-concert sa Pilipinas.

Sa isang panayam para sa ABS-CBN News, sinabi ng singer-composer na kailangang mas mataas na buwis ang ipataw sa foreign artists na dumadayo sa Pilipinas para magtanghal.

"We must push for higher taxes on foreign shows and lowering of taxation sa local concerts," saad ni Ogie, presidente ng Organisasyon ng Pilipinong Mang-aawit (OPM).

Ang OPM ang "leading and most respected organization of Filipino professional singers in the country," ayon sa website nito.

Nauna nang sinabi ni Kuh na dapat pag-aralan ng mga mambabatas kung paano mapoprotektahan ang kapakanan ng mga lokal na mang-aawit.

Ayon pa kay Kuh, nagko-concert na ang foreign artists sa Valentine's season ng Pilipinas, isang panahon kung saan maraming local singers ang nagdaraos ng sariling mga concert.

Sa Pebrero 12 at 13 magaganap ang concert ni Kuh sa PICC. Makakasama niya rito ang Hitmakers na sina Rico J. Puno, Marco Sison, Nonoy Zuñiga, at Rey Valera.

Sa Pebrero 12 naman magaganap ang concert nina Ogie Alcasid at Pops Fernandez sa Crowne Plaza. Magiging guest dito si Regine Velasquez na bagong kasal kay Ogie.

Nag-aalala ang local artists dahil makakalaban nila sa atensyon ng concert-goers ang mga concert ng foreign artists sa parehong panahon.

Kasama rito ang concert ni Janet Jackson sa Pebrero 4; Stephen Bishop, Dan Hill at Yvonne Elliman sa Pebrero 11; Deftones sa Pebrero 12; Per Sorensen ng Fra Lippo Lippi sa Pebrero 13; Taylor Swift sa Pebrero 19; at ang Yellowcard sa Pebrero 20.