Punung-puno ng halakhakan ang press conference ng pinakabagong afternoon series ng ABS-CBN na Precious Heart Romances Presents Mana Po kahapon, February 17, sa 14th floor ng ELJ Bldg. ng ABS-CBN.

Ito ay dahil na rin sa sagot ng cast members, na pinangungunahan ng magkasintahang Melai Cantiveros at Jason Francisco, sa mga tanong ng press.

Pagkatapos ng general presscon ay nagkaroon ng pagkakataon ang PEP (Philippine Entertainment Portal) at iba pang press na makausap si Melai.

TWO-IN-ONE CELEBRATION. Unang kinumusta kay Melai ang naging Valentine date nila ng kasintahan niyang si Jason.

Aniya, may taping sila noong mismong Araw ng mga Puso, February 14. Pero sabay nilang ipinagdiwang ang Valentine's day at ang kanilang first anniversary bilang magkasintahan noong February 8.

"Sabi niya [Jason], package deal na daw yung aming date, sobrang pagkagastos niya," sabi ni Melai.

Naganap daw ang kanilang date sa Mandarin Hotel.

Kuwento ni Melai, "Nagulat nga ako kasi nag-absent siya sa taping ng Banana Split. Nag-taping kami ng Mana Po, tapos maaga siya natapos. Pagkaalis niya, nag-change location...

"Tapos, nagulat na lang ako bumili pala siya ng flowers at ibinigay niya sa akin ng alas-dose. Tapos, sabi niya, 'Meron tayong gagawin bukas, gala tayo.'

"Sabi ko, 'Meron akong gagawin, matatapos yun ng mga 7.' Nagpaalam daw siya kay Mama Bear (Cynthia Jordan, business unit head of Banana Split) na mag-a-absent siya, tapos nag-arrange pa talaga siya.

"Minsan lang kami mag-bonding nang ganun."

THE RING. Akala raw ni Melai ay bulaklak lang ang regalo sa kanya ni Jason.

"Binigyan niya ako ng ring!" bulalas niya.

Natuwa ang press sa sinabi ni Melai at saka sabay-sabay na nagtanong kung engagement ring na ba ito.

Hindi pinansin ni Melai ang tanong at ipinagpatuloy ang kanyang kuwento.