Larawan ng kasiyahan si Marian Rivera sa relaunching ng Yes Pinoy Foundation (YPF) na ginanap noong Linggo ng gabi, February 27, sa NBC Tent sa The Fort, Taguig City.

Bilang girlfriend ng founder at chairman ng YPF na si Dingdong Dantes, naipakita ni Marian ang buong suporta niya sa boyfriend at sa foundation nito.

"Siyempre, hindi lang ako, lahat kami ng mga taong naniniwala sa kanya ay sobrang proud. Alam mo yung nalagpasan ang expectation namin sa kanya," sabi ni Marian sa panayam sa kanya ng PEP (Philippine Entertainment Portal).

Talagang naglalaan daw ng panahon si Marian para sa YPF tulad noong araw na yun.

"Hindi lang sa araw na ito dahil simula pa lang na inisip niya itong Yes Pinoy Foundation, nasa likod na niya ko at hanggang ngayon, siyempre, sumusuporta pa rin. 

"Sabi ko nga, wala man akong maitutulong sa mga brainstorming nila, pero nandiyan yung love ko, prayers. At saka, ipinagluluto ko sila sa meetings nila. Sabi ko, yun lang talaga ang maitutulong ko sa kanila," pahayag ng aktres.

Tinanong ng PEP si Marian kung totoo bang siya ang dahilan kung bakit nabuo ang Yes Pinoy Foundation, gaya ng laging binabanggit ni Dingdong?

"Hindi lang siguro ako. Nasasabi lang siguro niyang ako, pero alam ko naman na mas maraming dahilan kung bakit niya ginagawa yun dahil napakabuti niyang tao. Yun ang totoong dahilan," sagot niya.

Nakita raw ni Marian ang pagiging hands-on at effort na ibinubuhos ni Dingdong para sa YPF.

"May mga araw 'yan na talagang nagte-text na talagang nai-stress na siya.  Hindi na niya alam kung ano ang gagawin niya from scratch," aniya.

Bilang girlfriend, sa paanong paraan naman niya naipapakita ang suporta niya kay Dingdong?

"Tine-text ko siya. Pinapadalhan ko siya ng mga sweet messages. At saka, palagi kong sinasabi sa kanya na, 'Kaya mo 'yan. Hindi ibibigay sa 'yo ni Lord 'yan kung hindi mo kayang gawin dahil alam niya na ikaw ang magiging way para tumulong sa ibang tao.'"

FIRST LADY? Biniro namin si Marian na "very first lady" ang dating niya nang magkatabi silang sumalubong ni Dingdong sa panauhing pandangal noong gabing yun na President Noynoy Aquino, together with GMA Network Chairman Atty. Felipe Gozon at DSWD Secretary Dinky Soliman.

"Hindi!" bulalas niya. "Natatawa nga ako kasi yung pinaka-bodyguard ni President Noy, tinawag ako. Sabi niya, Ma'am, puwede po bang pumunta kayo sa entourage ni President?' Sabi ko, 'Ako, sasama?'

"Ang ginawa ko, nag-mingle pa ako, kasi yung mga friends ko, nandito.  Nag-thank you pa ako na nagpunta sila rito dahil alam kong naglaan pa sila ng oras. It's a Sunday, it's a family day, pero nandito sila.