Ang young balladeer na si Gerald Santos at ang Star Factor runner-up na si Morisette Amon ang singing duo sa bagong Sunday musical-variety show ng TV5, ang Fantastik.

"May segment po kami, ang title, 'Heartbeats,'" banggit ni Gerald nang makausap siya ng PEP (Philippine Entertainment Portal) sa launch ng Sunday block ng TV5.

Biniro namin si Gerald kung ganoon niya kabilis napalitan ang dati niyang kasamahan sa GMA-7 na si Jonaly Viray. Parehong winners ng singing search ng Kapuso network na Pinoy Pop Superstar sina Gerald at Jonalyn; si Jonalyn ang nanalo noong Season 1 at si Gerald naman noong Season 2.

"Hindi naman po!" tumatawang sabi ni Gerald. "Si Jonalyn, friends naman kami ni Jonalyn, e. Nagkaka-text-an pa rin, pag may mga shows, nag-i-invite-an pa rin kami to each other. Pero ganun na lang. Hindi na po nagkikita, e."

Baka biruin siya ni Jonalyn na ipinagpalit na niya ito kay Morisette?

"Okay lang!" at muli siyang tumawa. "Ano naman kami nun, e, kalog din naman kasi si Jonalyn, so ano lang yun, joke lang yun."

Sa ngayon, wala pang girlfriend si Gerald. Hindi kaya ma-develop silang dalawa ni Morisette?

"Older po ako sa kanya, e," sagot ng binata.

Fourteen years old lang si Morisette at 20 naman si Gerald.

Dagdag niya, "Tingnan po natin. Hindi po puwedeng magsalita ng tapos, hindi po ba? Ngayon, nasa getting-to-know-each-other stage pa lang po kami."

Pero dahil bata pa nga si Morisette, hindi raw siya nanliligaw dito.

FREELANCER. May exclusive contract ba si Gerald sa TV5?

"Hindi pa po. Wala pa po akong contract sa kahit na saang network," sagot niya.

Sa Fantastik lamang daw ang contract niya.

Bukod sa pagkanta, open din si Gerald sa acting projects.