Birthday ngayong araw, March 21, ng aktres na si Lotlot de Leon.

Noong Sabado, March 19, bilang selebrasyon ng kanyang kaarawan ay nagsagawa ng feeding program at gift-giving ang aktres sa White Cross Orphanage sa San Juan City.

Ang naturang insititusyon ay kumakalinga sa mga bata mula 0 to 12 months na inabandona o sa kung anong kadahilanan ay nawalan ng mga magulang na mag-aaruga.

CHARITY WORK. After the charity event, nakausap ng PEP (Philippine Entertainment Portal) si Lotlot sa Blufrog Bar & Restaurant sa Tiendesitas, kung saan nag-dinner ang aktres kasama ang kanyang mga anak at malalapit na kaibigan.

Ang unang itinanong ng PEP kay Lotlot ay kung bakit naisipan niyang magsagawa ng charity work sa White Cross.

"Dati po kasi, si Mommy [Nora Aunor], doon din nagpupunta nung bata ako. If I remember right, pag si Mommy nagpapadala ng bigas, ng pagkain, sa White Cross niya ipinapadala, tapos ako ang kasamang nagdadala nun. Yung mga bigas na naka-pack na at mga pagkain," sabi ni Lotlot.

Sinimulan ni Lotlot gawin ang kanyang sariling charity work noong Christmas of 2010.

"Opo, I used to go there, pero never pa akong nakapagpa-feeding. Dati, ang ginagawa ko lang, nagdadala ako ng mga clothes ng mga bata, mga toys nila, ganun. Pero never pa akong nagkaroon ng chance to be really with them, as in yung feeding na ganun.

"Sabi ko, uulitin ko talaga, ipinangako ko. Kasi ang tagal ko nang gustong gawin yun, e. Kaya lang dati, hindi ko alam kung paano sisimulan."

May kasunod ba ang pagdalaw niya sa White Cross? O sa ibang institution naman siya pupunta?

"Dun na muna siguro ako magko-concentrate," sagot ni Lotlot.

Kasama ni Lotlot sa pagpunta last Saturday sa White Cross ang mga kaibigan niyang aktres na sina Mymy Davao at Karla Estrada.

Ano ang naramdaman ni Lotlot habang kapiling niya ang mga bata earlier that day?

"Masaya na malungkot kasi, di ba, pag nakikita mo yung mga bata... At saka ano lang ako, e, feeling ko kasi, isa ako sa kanila. So, malapit talaga yung puso ko sa kanila."

Hindi naman lingid sa kaalaman ng marami na adopted daughter si Lotlot nina Nora Aunor at Christopher de Leon.