Halos mag-iisang buwan na—matapos maganap ang kontrobersiyal na episode ng Willing Willie—hindi pa rin humuhupa ang usapin. Sa katunayan, lalo pa itong umiinit sa pagdaan ng mga araw.

Kaya minabuti ng PEP (Philippine Entertainment Portal) na i-review ang masalimuot na kontrobersiya upang makita ang "big picture" at ang maaaring patutunguhan nito.

Ang nasabing episode noong March 12 ay kinasasangkutan ng isang anim na taong gulang na contestant, si John David Suan—o mas nakilala sa kanyang palayaw na Jan-Jan.

Sa larong "Wiltime Bigtime," ipinakita ni Jan-Jan ang kanyang talento sa pagsasayaw. Ito'y tinagurian mismo ng main host ng programa na si Willie Revillame na isang uri ng "sexy dance." (CLICK HERE to read related article.)

GOING VIRAL.  Kung titingnan ang naging takbo ng mga pangyayari matapos umere ang pagsayaw ni Jan-Jan, hindi agad ito nakapukaw ng atensiyon, maliban sa mga taong nakapanood ng Willing Willie noong araw na 'yon.

Subalit mabilis na kumalat ang video clip sa YouTube—ang popular na video sharing website—na kuha sa March 12 episode ng Willing Willie.

Sa paglabas ng video sa Internet, marami ang nakapanood ng segment kung saan naroon si Jan-Jan, at sa isang iglap ay nagkaroon ito ng malawakang ingay mula sa mga manonood.

Kasabay nito ang pagbato ng batikos laban kay Willie Revillame bilang main host ng programa.

Pakiramdam ng marami ay nagkaroon ng paglabag sa karapatan ng batang contestant sa dahilang paulit-ulit na pinasayaw ni Willie dito ang "sexy" dance number na ipinamalas nito sa pagsisimula ng "Wiltime Bigtime" segment.

Hindi rin daw nakatulong ang mga binitawang salita ni Willie na may kaugnayan sa istilo ng pagsasayaw ni Jan-Jan.

"Ganyan na ho ang hirap ng buhay ng tao. Jan-Jan, siyempre nagsasayaw siya bilang macho dancer sa edad niyang 'yan, para sa kanyang mahal na pamilya!" bulalas ni Willie sa mikropono.

PUBLIC UPROAR. "Child abuse" ang ibinabatong paratang laban kay Willie at sa kanyang programa sanhi ng pangyayari.

Maging ang ilang artista at celebrities ay nagpahayag ng kanilang hindi pagsang-ayon sa kanilang napanood.

Kasama sa mga showbiz personalities na nagsalita laban sa programa ay sina Aiza Seguerra, Lea Salonga, Jim Paredes, Kat de Castro, Bianca Gonzales, Mylene Dizon, at Monique Wilson.

Nanawagan ang mga ito sa publiko na i-boycott ang Willing Willie, at sa mga advertisers naman, na huminto na sa pagbibigay ng suporta sa programa sa pamamagitan ng pag pull-out ng kanilang mga ad placements.