Matagumpay ang naging launching kahapon, May 14, ng show na ipinalit sa kontrobersiyal na Willing Willie, ang Wil Time Bigtime, na live na napanood sa TV5.

Naimbitahan ang PEP.ph (Philippine Entertainment Portal) at iba pang press para saksihan nang live ang show sa studio ng Kapatid Network sa Novaliches.

Damang-dama ang excitement sa loob ng studio sa mahigit tatlong oras na airing ng Wil Time Bigtime.

Siyempre, bukod sa host at co-producer ng show na si Willie Revillame, tuwang-tuwa rin ang co-host niyang si Valenzuela City Councilor Shalani Soledad sa magandang pagtanggap ng mga tao sa Wil Time Bigtime.

"Masayang-masaya kami. Alam mo, ilang days na itong pinagpupuyatan, pinaghihirapan," pahayag ni Shalani nang makausap siya ng PEP pagkatapos ng show.

"In fact, kagabi, umuwi kami past twelve na. So, talagang pinapaganda namin at pinaghahandaan.

"So, masaya lahat kasi nakita naman natin na worth it yung mga pinagpaguran."

May creative input din ba siya sa konsepto ng Wil Time Bigtime?

"Input in terms of suggestions, meron," sagot ng main lady co-host.

"Pero yung about sa games, nag-team building kami. It was a team effort—from Willie, to our headwriter, sa staff.

"Lahat talaga hiningan ng input, pati yung title ng bagong games."

LOYAL SUPPORTERS. Thankful daw si Shalani sa supporters ng show nila na hindi bumitaw sa pagsuporta, lalo na sa loob ng isang buwan na nawala sa ere ang Willing Willie.

"They who have been sending their prayers, they who have been sending words of encouragement. Salamat.

"I would also like to thank TV5 management.

"Of course, our big boss, Mr. MVP [Manny V. Pangilinan] dahil yung support niya talaga all throughout, talagang ipinaramdam niya sa amin."

Tinukoy ni Shalani na pati mga suweldo nila ay hindi inalis sa kanila.