Sa tuwing nagkakasama sa isang event ang dating Sabel loveteam na sina Jessy Mendiola at Joseph Marco, hindi maiwasan na tanungin sila tungkol sa kanilang dating kasama sa programa, ang yumaong binatang aktor na si AJ Perez.

Katulad kahapon, Mayo 25, pagkatapos na kanilang hosting stint para sa iniendorso nilang Timex watches, ramdam pa rin na tila may kulang sa pagsasama nina Jessy at Joseph.

Kahit si Jessy, aminado siya na hanggang ngayon ay hindi pa rin siya makapaniwala na wala na nga ang dati niyang kasamahan.

"AJ has a certain presence. So, until now, I still feel he's around. Gano'n pa rin," sabi ng dalaga.

Dagdag pa ni Jessy, "The AJ that I know, na nakikita mong masaya, gano'n pa rin ang aura ko. Kahit pumunta ako ng ABS-CBN or sa taping, I still feel that he's around."

Samantala, hindi naman ikinaila nina Jessy at Joseph na malaking bahagi si AJ ng kasikatang nakuha nila mula sa Sabel.

Sa pagpanaw ng kanilang katrabaho at kaibigan, nagsilbi rin itong paalala sa kanila na dapat maging laging mahusay sa anumang ginagawa.

Ani Jessy, "Live life to the fullest.

"AJ was gone too soon.

"I think it's better to say 'I love you' every day or do the best you can with everything that you do."

Sumang-ayon naman si Marco.

Aniya, "Parang life is too short, iparamdam niyo na sa mga taong mahal mo na talagang mahal mo sila.

"And just do good things."

NEXT TV PROJECT. Sa ngayon, hindi pa sila sigurado pareho kung ano ang kanilang susunod na proyekto sa telebisyon.

Abala ang dalawa ngayon sa kanilang regular appearance sa ASAP Rocks at out-of-town shows.