Nakorner ng PEP.ph (Philippine Entertainment Portal)  si Iwa Moto sa pictorial nito sa GMA Network Center kahapon, May 27.

Tila nakabalik na ito sa dating ayos na masayahin, kaya agad namin nakumbinseng magpa-interview na.

Ang isa sa una naming nilinaw sa kanya ay ang isyung nagtangka itong magpakamatay dalawang linggo nang nakaraan.            

Ani Iwa, "Masyado ko pong mahal ang sarili ko para magpakamatay," sabay bitaw ng malutong na halakhak.            

"Ano lang po, sobra sa stress. I admit stress po ito, and two days before ang nangyaring yun, I was hospitalized because of the, yung binasag ko, and kailangan kong uminom ng antibiotics."

Two weeks ago, nag-away si Iwa at ang boyfriend niyang si Mickey Ablan, ayon sa report ng PEP. Marami ang nakasaksi na nagtatakbo si Iwa sa may GMA Network Drive na may hawak na bakal at hinahanap si Mickey.

Napagdiskitahan nito ang kotse ng boyfriend at binasag ang salamin sa likuran. Nagkasugat-sugat ang kamay ni Iwa at duguan din ang kaliwang tuhod nito.

Sa pagpapatuloy ni Iwa, "Sa mga gamot kasi atsaka nung ti-nest din ako, marami din akong kulang sa katawan.

"Marami akong vitamins at medicine na tini-take and then I forgot to eat.

"I was alone that time, e syempre sa taas namin, nag-lock ako.

"Yun, sa katangahan ko nag-antibiotics na walang laman ang tiyan and yun na ang nangyari," paliwanag nito.            

Ipinakita nito ang dalawa niyang pulso para mapatunayang hindi raw siya naglaslas.

Ayon kay Iwa, kaya hindi raw muna siya nagsalita pagkatapos ng mga gulong nangyari sa kanila ni Mickey dahil gusto raw muna niyang ayusin ang kanyang sarili, pati ang kanyang pamilya at mga taong naapektuhan.            

"Talagang sinadya kong manahimik, kasi wala naman akong masasabing ikabubuti ng mga nangyayari, so kailangan manahimik muna ako," aniya.

"Habang nananahimik ako, sini-settle ko yung mga bagay na kailangan kong ayusin. Like yung mga taong naapektuhan, I have to talk to them. Kailangan yung mga bagay na nasira ayusin ko."