Aminado ang Talentadong Pinoy host at bagong celebrity endorser ng Shell FuelSave Unleaded and Diesel na si Ryan Agoncillo na pagdating sa "drifting," mas madaling natuto ang misis niyang si Judy Ann Santos, kaysa sa kanya.

Ang drifting ay isang istilo ng pagmamaneho sa car racing or motorsport, kunsaan eksaherado—pero kontroladong—pinaliliko ng driver ang kotseng minamaneho. Nagdi-drift ang isang kotse kung mas malawak ang idinulas ng hulihang gulong kaysa sa unahan habang lumiliko, at kung nakatutok ang mga unahang gulong sa baligtad na direksyon ng nililikuan (halimbawa: nakatutok sa kaliwa ang mga front wheels, habang lumiliko ng kanan ang sasakyan, and vice-versa).

Sabi pa ni Ryan sa PEP.ph (Philippine Entertainment Portal) at iba pang kaharap na mga miyembro ng media, pagkatapos ng actual presscon ng Shell kaninang tanghalian, July 11, sa Makati Shangri-La, Makati City: "Ako, siguro mga...three months, bago ko natutunan [ang drifting]. Asawa ko, mga three hours.

"Mas madaling turuan, minsan, ha, ang mga babae. Gagawin lang nila yung mga tinuturo. Yung mga lalaki, kung anu-ano ang susubukan, e," katwiran pa ni Ryan.

SUPERWOMAN JUDAY. Kung tawagin nga ni Ryan ang asawang aktres —"superwoman."

Bukod kasi sa madaling matuto ay ibang klase raw ang galing sa time management ni Juday. Nagagawa raw nito ang mga duties sa mga anak (Yohan at Lucho), sa kanya, at pagharap sa career nito.

"Minsan, naaawa na ako sa kanya. Like kanina, she woke up at 5 in the morning to make the breakfast of Yohan. Tapos nag-nap lang siya ulit, gumising naman siya to make my breakfast. Tapos tulog na ulit. Tapos may meeting na siya ngayon," kuwento ni Ryan sa activities ni Juday mula umaga hanggang pananghalian.

"Ibang klase, e. Ibang hirap din yung ginagawa niya. But she's doing it well. What she does is she spaces out her work.

"Halimbawa, Monday, shoot. Tuesday, with the kids and family. Wednesday, shoot ulit. And then, one last shoot uli siguro Thursday, and then the rest of the weekend, off na siya."

Sobra-sobra raw ang paghanga at tiwala niya sa abilidad ni Juday na hindi na nga raw siya kailangan nito para tumulong.

"Actually, wala naman siyang kailangang masyadong tulong dahil kayang-kaya naman niya, e. Ano lang, sumbungan lang niya ako pagka ninenerbiyos, o kaya halimbawang medyo na-delay ang shooting dahil umuulan nang malakas.

"Sumbungan lang ako. Taga-encourage."

CHANGING NETWORKS AGAIN? Dahil nagiging busy na uli si Juday sa ABS-CBN (sinisimulan na nito ang bagong show na iho-host, ang Junior Master Chef), may usap-usapang lilipat daw uli si Ryan sa Kapamilya Network.

"Kalilipat ko lang, lilipat ako ulit?" biro ni Ryan sa nagtanong.

"Hindi, wala. Sa ngayon, I maintain an open relationship with all networks.