Mga close friends lang ng mag-asawang Carlene Aguilar at Yo Ocampo ang dumalo sa baby shower para kay Carlene na ginanap sa isang function room sa Wack Wack Twin Towers noong Miyerkules ng gabi, August 31.

Si Sherilyn Reyes ang bumuo ng party para sa kanyang best friend.

Invited din sa party ang kaibigan nilang si Angelu de Leon, na apat na buwan na ring buntis.

Masayang ikinukuwento ng magkakaibigan na every three months daw sila may pa-baby shower dahil pagkatapos manganak ni Sherilyn, si Carlene nga ang sumunod, at si Angelu ang panghuli.

Sa first week of October ang due ni Carlene at baby boy ang iluluwal nito na papangalanan daw nilang Marcus Iñigo.

Mga malalapit din nilang kaibigan ang magiging ninong at ninang dahil iyun na raw ang napagkasunduan nila.

Ayon kay Carlene, kakaiba itong pagbubuntis niya ngayon kung ikumpara sa panganay niyang si Calix Andreas dahil siya lang daw ang mag-isa sa Amerika, kung saan doon niya iniluwal ang anak nila ng dating kasintahan na si Dennis Trillo.

"Iba siyempre ito ngayon dahil nandiyan ang asawa mo, nandiyan ang mga friends mo na nasa tabi mo.

"Kasi iba yung nanganak sa abroad na parang mag-isa ka lang," pahayag ni Carlene sa PEP.ph (Philippine Entertainment Portal).

Excited din si Yo sa kanyang magiging panganay, pero tiniyak na nila na walang mababago sa pagtingin nila at pag-aalaga kay Calix.

Ani Carlene, mas lalong naging close pa raw ngayon si Calix kay Yo, at natutuwa ang huli dahil parang anak na rin daw talaga ang turing niya sa bata na "Daddy Yo" na nga ang tawag sa kanya.

Kuwento ni Carlene, "Ngayon pa lang ay ini-explain na namin sa kanya [Calix] na magkakaroon na siya ng baby brother.

"Excited naman siya. Lagi niya tinatanong sa akin kung kailan na lalabas.       

"Pero hindi naman mawawala yung nagselos, siyempre four years old pa lang siya, hindi naman niya naintindihan yun.

"Pero ngayon talaga naka-concentrate kami sa kanya habang wala pa ang baby."