Ang dating Kapuso at ngayo'y Kapamilya nang si Paulo Avelino ang isa sa ten centerfolds ng Cosmopolitan magazine this year.

First time din ni Paolo na makasama at rarampa sa Cosmo Bachelor Bash kaya marami ang nagulat sa ipinakita niyang tapang sa pictorial, kung saan tuwalya lang ang nagtatakip sa maselang bahagi ng kanyang katawan.

Sa presscon na ipinatawag ng Cosmopolitan para sa Cosmo Bachelor Bash kahapon, September 6, na ginanap sa Richmonde Hotel, tinanong ng PEP.ph (Philippine Entertainment Portal) si Paulo tungkol sa kanyang daring pictorial.

"Oo nga, e. Hindi ko rin ine-expect na magiging ganoon ka-daring. Pero, okay naman. 

"Wala namang nakitang hindi kanais-nais, so happy naman ako," saad niya.

Naniniwala si Paulo na "right time" na para sa kanya ang mag-pose para sa Cosmopolitan at rumampa sa Cosmo Bash kaya hindi naman daw siya kinailangan pang kumbinsihin nang todo.

"Sinabi lang din sa akin ng manager ko," banggit ng aktor sa kanyang manager na si Leo Dominguez.

Dagdag pa niya, "Tinanong ko lang kung gaano katagal ang preparation. Medyo nagkulang ang time, so, yun lang."

Gaano ba siya ka-confident sa katawan niya ngayon?

"Siguro in a scale of 1 to 10, mga 8. Kulang din ang time to fully prepare," sagot niya.

Abangan na lang daw kung ano ang gagawin niya sa Cosmo Bachelor Bash.

"Hindi ko pa nga alam kung papayagan ako na may gawing hindi kanais-nais!" tawa niya.

Ano naman ang masasabi niya na siya raw ang "yummiest" among the Cosmo centerfolds this year?

Sabi naman ni Paulo, "Ako? Hindi ko alam kung paano magre-react.

"Thank you na lang na ako... siguro hindi ko rin ini-expect na ganoon ang lalabas."