Nakakuwentuhan ng PEP (Philippine Entertainment Portal) ang actress-host na si Iza Calzado kahapon, October 19, sa GMA-7 compound kung saan naganap ang intimate press conference para sa bago niyang show na Showbiz Exclusives.

Isa si Iza sa trio of hosts na taga-hatid ng showbiz news sa GMA News TV tuwing alas-7 ng gabi.

Kasama niya rito sina Nelson Canlas at Aubrey Carampel ng GMA News.

SWITCHED ROLES. Tila nabaliktad na nga ang role ni Iza dahil kung noon ay siya ang laman ng tsismis at intriga, ngayon ay siya naman ang tagapag-balita nito.

"Actually, I was very scared to host for the show," kuwento ni Iza

"Pero, like anything nga, I just try to be as neutral as possible.

"And kung may sasabihin ako, sisiguraduhin ko na lang na kaya kong panindigan, 'di ba?"

Aminado si Iza na mahirap pagsabayin ang pagiging artista at pagiging lehitimong tagapag-balita.

"Ang hirap, ang hirap. Pangarap kong maging journalist pero gusto ko yung documentary type, e. Yung parang Howie [Severino], Kara [David].

"Pero kung ano man yung ibinigay sa'kin, it's still always a training ground and it's still work.

"And it's fun to be with Nelson and Aubrey. Like I said, it wasn't as bad as I thought it would be.

"Dati kasi parang 'Oh, my gosh! Showbiz news!" Parang may takot ako dati, e, pero wala naman.

"Parang as long as wala ka naman kasing intention na siraan ang isang tao, and I don't think [iyon ang goal namin sa show], we just want to deliver the news."

MOVING FORWARD. Bagamat reporter nang maituturing si Iza ngayon, hindi pa rin naman nawawala ang kanyang buhay artista kung saan kaakibat ang mga intriga.

Sa katunayan, sa una nilang taped episode ay na-interview siya ng kanyang co-hosts para sa segment na "Artist Talks."