Hanggang ngayon ay wala pa ring balita kung naayos na ni Claudine Barretto ang nangyaring aberya sa kanya habang nagwi-withdraw siya sa isang bangko sa Quezon Avenue, Quezon City, noong Martes, October 25.

Wala pa ring linaw kung nabawi na ba niya ang diumano'y biglang nawalang perang wini-withdraw niya mula sa joint account nila ng asawang si Raymart Santiago.

Wala pang bagong statement na inilalabas ang kampo ni Claudine kahit na sinubukan na ng PEP.ph (Philippine Entertainment Portal) na makipag-coordinate sa abugado nitong si Atty. Agnes Maranan at manager na si Shirley Kuan.

Maging si Raymart ay hindi rin nagsasalita tungkol sa isyu.

Sa report ni Nelson Canlas para sa 24 Oras na napanood noong October 25, sinubukan ng GMA News reporter na tanungin si Claudine kung ano ang nangyari, pero umiiyak nitong sinabi na, "Tanungin n'yo na lang yung lawyer ko, please."

Ngunit nitong gabi lang, October 27, sa showbiz talk show ng GMA News TV Channel 11, ang Showbiz Exclusives, ay napanood ang maikling interview kay Claudine noong araw ng insidente habang nilalahad ang nangyari.

Ayon kay Claudine, nakausap pa mismo niya ang branch manager na siyang pipirma ng kanyang application.

Ngunit makalipas lang ang limang minuto nawala na raw ang pera sa kanilang account.

"Yung pera ko nawawala, hindi binibigay. In a span of what, five minutes na nandun, biglang nawala. Ayaw ibigay ng branch manager nila," emosyonal na sabi ni Claudine.

Rebelasyon pa ni Claudine, pagkatapos sumulpot ang aberya ay ayaw na raw siyang harapin ng manager at nagtago pa ito.

"Nagtatago... hinanap ko, biglang nagtago sa loob ng CR [comfort room]."

Sa unang pagkakataon din ay ipinalabas ng Showbiz Exclusives ang dagdag na paliwanag ni Atty. Maranan tungkol sa nangyari.

"We were told, kailangan ang branch manager ang pumirma ng application for a manager's check.

"When she looked at the application for a manager's check, she told us that wala na raw yung pera.

"There was a transaction at 12:42 [p.m.], which moved the fund. But I was not told kung saan na-move yung fund."