Live na nagsalita si Jennylyn Mercado sa Showbiz Central kahapon, Linggo, October 30, hinggil sa pagkakasangkot niya sa diumano'y gusot sa pagitan ng mag-asawang Raymart Santiago at Claudine Barretto.

Bakit siya nadawit sa isyu? Dahil ba siya ang leading lady ni Raymart sa nagtapos nang soap ng GMA-7 na Futbolilits?

Ani Jennylyn, "Iyon nga ang iniisip ko. Sabi ko, 'Bakit parang masyadong late para sa isang..."

Tapos na ang airing ng show nila...

"Oo, tapos na ang Futbolilits.

"Sa totoo lang, hindi ko talaga alam.

"Wala talaga akong idea kung paano ito... ano'ng nangyari.

"Bigla na lang, paggising ko, nag-text sa akin ang manager ko [Becky Aguila], 'Ano ito, bakit nadadawit ka sa isyu nilang dalawa?'

"Para sa akin, parang nakaka... masyadong nakakagulat tsaka hindi nakakatuwa.

"Hindi siya... hindi maganda sa paningin, sa pandinig ng lahat ng tao," pahayag ni Jennylyn.

FORMER CO-STAR. Close ba sila ni Raymart sa set ng Futbolilits? Magkaibigan ba sila? Nagte-text-an ba sila? Magkahiwalay ba o magkasama ba sila sa dressing room?

"Well, kaming lahat, magkakaibigan talaga kami sa Futbolilits.

"Talagang nagkaroon kami ng... Nung natapos kami, talagang nag-iyakan kami kasi talagang para kaming pamilya.

"Pero siyempre, pag nasa dressing room... hiwalay naman yung dressing room ng babae tsaka ng lalaki.

"So, hindi naman yung, di ba, magkadikit kami, tapos... Kumbaga, sa take lang kami nagkakausap, ganyan," paliwanag ni Jennylyn.