Kahapon, Nobyembre 3, lumabas dito sa PEP.ph (Philippine Entertainment Portal) ang pagkondena ni Senador Tito Sotto sa isinagawang "7th Billion Baby" media campaign ng Department of Health (DOH).

Ginawa ito ng DOH sa pakikipagtulungan sa United Nations Population Fund (UNPFA).

Sinabi ni Senador Sotto na ang campaign ay "misleading" at estratihiya lamang ng DOH para maisulong ang pag-aapruba sa Reproductive Health Bill. (CLICK HERE for related article)

Hiningi namin ang reaksyon ng DOH hingil sa mga sinabi ng senador.

Nang tawagan namin sila ngayong umaga, Nobyembre 4, sinabi ng aming nakausap, si Mae de Guzman, na mas mabuting makausap ang Commission on Population of the Philippines (POPCOM).

Ang POPCOM, isang ahensiyang napapaloob sa DOH, ang siyang nag-ayos umano ng nasabing campaign.

Nakausap ng PEP si POPCOM Acting Deputy Executive Director Rosalinda Marcelino.

Nilinaw nito na totoong tumulong ang DOH at POPCOM sa paglunsad ng "7th Billion Baby" media campaign. 

Ngunit ang kampanya ay brainchild daw ng mismong United Nations (UN).

Bilang signatory ang Pilipinas sa UN, may dahilan sa pagsuporta ng DOH at POPCOM sa kampanya.

Sa salita ni Marcelino: "We're not the ones who launched the campaign.

"It's the UNPFA, United Nations Population Fund, who planned this."

At liban daw sa pagiging signatory ng Pilipinas sa UN, sumali ang local health agencies na gaya ng POPCOM at DOH dahil mahusay ang adhikain ng kampanya.

PEOPLE'S AWARENESS. Ang pangunahing adhikain ng kampanyang ito, ayon kay Marcelino, ay ipaalam sa publiko ang patuloy na pagtaas ng populasyon.

Hindi lamang daw sa ating bansa, kundi pati sa buong mundo. Kaya nga raw ang UN na mismo ang nagpasimuno nito.