Tigas sa pagtanggi si Erich Gonzales na hindi niya kilala si Mikael Daez nang makapanayam ito ng PEP.ph (Philippine Entertainment Portal) sa presscon ng Maria La del Barrio sa White House, Quezon City.

 
"Sino yun? Sorry..." giit ni Erich nang tanungin ng PEP kung totoong magkasama sila ni Mikael sa isang mall na magka-date, ayon na rin sa inilabas na litrato ng fashionpulis.com.

Sa retrato'y magkahawak kamay ang babae't lalaki habang paakyat ng escalator.

 
"Hindi ko pa siya nami-meet in person. Hindi ko siya talaga kilala," muling nasabi ni Erich nang muling tanungin namin kung talagang hindi niya kilala ang aktor na napapanood sa GMA-7.

At nang tanungin muli ng PEP kung hindi ba niya ito nakikita sa TV, aniya, "Hindi po e."

 
Iginiit pa ni Erich na hindi siya nagpupunta ng mall na may kasamang lalaki.

 
Pero sinabi ng batang aktres na handa naman siyang ma-in love nang kumustahin ang kanyang love life.

"I'm ready to fall in love, pero it doesn't mean naman na kailangang magmadali, ine-enjoy ko naman po ang buhay ko," saad niya.

"May napupusuan na po ako o may nanliligaw pero non-showbiz. Kung sino po iyon, wag na lang po kasi hindi naman po siya showbiz."

 
LOVE TEAM. At sa mga nagpipilit at nagtataka kung bakit hindi sila magkatuluyan ng kanyang ka-love team na si Enchong Dee, sinabi ni Erich na magkaibigan lang talaga sila.

 
"Hindi naman po kailangan na maging kami.

"Kasi po yung mga supporters namin, sinusuportahan yung love team namin, kahit alam nila na hindi kami o wala kaming relasyon sa tunay na buhay o may individual partners kami.

"Kahit hindi kami in real life, more important is yung suporta nila sa amin, na susuklian namin yung kabutihan nila to make them happy.

 
"Ang sa amin po ni Enchong trabaho lang talaga."

In the future, does she have plans to leave her love team with Enchong and go solo?

"Hindi ganoon kadaling umalis sa love team namin. Hindi ganoon basta-basta [kadali] bumitaw sa kung anuman ang nabuo namin.

"Kasi ayaw kong makasakit sa fans namin.

"Isa sa dahilan kung bakit kami nandito, dahil sa kanila at gusto kong suklian iyon. They're also very supportive naman sa individual projects namin."

EXTENDED. Samantala, masayang-masaya sina Erich at Enchong dahil extended ang kanilang Maria La del Barrio.

Nagsimula ang MLDB noong Agosto at dapat sana'y magtatapos ngayong Nobyembre.

Pero dahil sa magandang ratings nito, na-extend ito ng hanggang Pebrero 2012.

Ayon kasi sa nationwide ratings nito mula sa Kantar Media/TNS, nakakuha ng 21.2 percent ang MLDB laban sa kasabay nitong Daldalita ng GMA-7.