Itinanggi ni German "Kuya Germs" Moreno ang report na nagkabalikan na diumano sina John Lloyd Cruz at Shaina Magdayao.

Nakita raw kasi ang dalawa na magkasamang nanood ng concert ni Jed Madela, at ng musical play na The Little Mermaid kunsaan tampok sina Rachelle Ann Go at Erik Santos.

Ayon sa kuwento ni Kuya Germs sa PEP.ph (Philippine Entertainment Portal), nung makarating sa kanya ang balita, kaagad niyang tinanong si Shaina kung totoong magkasama nga sila ni John Lloyd at kung nagkabalikan na sila.

Pero mariin daw itong pinabulaanan ni Shaina sa kanya.

Si Kuya Germs ay malapit sa pamilya ni Shaina, na itinuturing na ring anak-anakan ng Master Showman.

Ang nakatatandang kapatid ng young actress na si Vina Morales ay miyembro noon ng youth-oriented show ni Kuya Germs na That's Entertainment.

Ang isa naman nilang kapatid na si Sheila Magdayao ay asawa ng anak ni Kuya Germs na si Federico Moreno.

Ayon kay Kuya Germs, "Ang dami nang nagtatanong sa akin tungkol diyan na kesyo nga daw nakitang magkasama si Shaina at John Lloyd, kaya naman marami ang nagsabi na baka nga daw nagkabalikan na yung dalawa.

"Yung iba tumatawag, yung iba naman text nang text.

"Kaya naman tinawagan ko kaagad si Shaina para itanong kung totoo bang nakitang magkasama na naman sila at kung nagkabalikan na sila [ni John Lloyd].

"Sabi sa akin ni Shaina, totoo nga daw na nagkasama sila, pero hindi lang naman daw sila.

"Marami daw sila na puro taga-ABS-CBN dahil may invitation sila na manonood ng Little Mermaid.

"Pero hindi naman daw porke't sabay silang nanonood, e, may balikan na daw na nagaganap, dahil wala naman daw talaga.

"Yun ang sabi ni Shaina."

Dagdag pa ni Kuya Germs, "Kung sabagay, hindi naman siguro masamang mapagkikita silang magkasama dahil maganda naman at nakapag-usap naman sila bago naghiwalay.

"Wala rin namang masama kung maging magkaibigan sila ulit, di ba, dahil may pinagsamahan naman sila.